Uummannami pikkorissarfik nutaaq pilersinneqassaaq
Uummannami pikkorissarfimmik nutaamik pilersitsisoqassaaq Aalisarnermut piniarnermullu ilinniarfiup matunerata kingorna
Ilinniartitaanermut, Ilisimatusarnermut Nunanillu Avannarlernik suleqateqarnermut naalakkersuisoq Palle Christiansen, Demokraatit aamma borgmester Jess Svane, Siumut, Qaasuitsup Kommununiata kommunalbestyrelsesinut ilaasortaallu sisamanngornermi ataatsimeeqatigiipput-
Sammisat ilagaat Uummannami Piniarnermut Aalisarnermullu Ilinniarfik, taanna Nuummut nuunneqartussaq.
Illuatungeriit isumaqatigiissutigaat pikkorissarfimmik pilersitsisoqassasoq Uummannami angerlarsimaffeqartumi, Uummannami ilinniarfimmik nutaamik pilersitsinissami sinaakkusiisussamik sulissutigineqarpoq tamakkiisumik aaqqissuussaqalernissaa tassani allamut naleqqussarluni ilinniaqqinnissaq, pikkorissarnissaq aamma aatsitassat pillugit pikkorissarfik Pikkorissarnermik qitiusoqarfimmi ingerlanneqarsinnaalersillugit.
Qitiusoqarfik taanna assigiinngitsunit atorneqarsinnaasariaqarpoq soorlu Uummannami meeqqat inuusuttuaqqallu sunngiffimminni ornittagaattut.
Inuussutissarsiorfinni ineriartortuni sulisussatut ilinniarfiit isiginiarneqartut
Qaasuitsup Kommunianit aamma Ilinniartitaanermut, Ilisimatusarnermut Nunanillu Avannarlernik suleqateqarnermut naalakkersuisoq Palle Christiansenimit kissaatigineqarpoq inuussutissarsiorfinni ineriartortuni sulisussatut ilinniarnerit isiginiarneqassasut.
- Aaqqissuussinissaq taanna aqqutigalugu aatsitassarsiornermi suliffeqalernissamut ilinniagaqarnissaq qulakkiissavarput. Piffissami aggersumi suliniut ilungersuutissavarput nunaqavissut amerlanerpaat aatsitassarsiornerup iluani piginnaasanik pisariaqartunik peqalernissaat qulakkeerniarlugu. Aatsitassanik suliassaqarfik annertusiartuinnarpoq piareersimaffigisariaqarparpullu, Palle Christiansen oqarpoq nangilluni, ungasianiit pikkorissarnerit kalaallit innuttaasut aatsitassarsiornermi sulilernissaannut atuaqqiffissaattut ilinniarfissaattullu pilersinneqartussaq neqeroorutaassasoq iluatinnaatilik.