KNR’ip siulittaasua ernumassuteqanngilaq

KNR'imi siulersuisut siulittaasuat Hans Peter Poulsen oqarpoq sulisunit isumasiuinermi paasisat siulersuisuni tupaallaataanngitsut. Siulersuisormi ernummateqannginnerarpoq. Isumasiuinermi Ipinionip suliaani paasinarsivoq sulisut akornanni 79-it pisortanik tatiginninngitsut.

Sulisunik isumasiuineq qanoq isumaqarfigaajuk?

- Sulisunut tunngassuteqartut tupaallaatiginngilagut taamatut inerneqarmata, susoqarsimanera eqqarsaatigalugu, Hans Peter Poulsen oqarpoq. KNR'imi sulisut ukiut kingulliit ingerlaneranni soraarsitsinernik aqqusaarneqartarnerat innersuussutigalugu.

Ernumavisi?
- Naagga, isumasiuineq ernumassutiginngilara.

Sulisut naammagisimaarinninnerat annertusarniarlugu siulersuisut qanoq iliuuseqassappat imaluunniit pisortaanerup tamanna suliassaraa?

- Pisortap suliassarilluinnarpaa, erseqqissaatigilaassavara aamma misissuinermi eqqartorneqarmata siulersuisut akisussaaffii sumi killeqarnersut, Hans Peter Poulsen oqarpoq innersuussutigalugu misissuinermi tikkuarneqarmat siulersuisut ulluinnarnik aqutsisunik akuliussinnaanngimmata aamma ulluinnarni aallakaatitassiornermik.

Nunatsinni tv'ikkut radioqarnermillu ingerlatsiffiup siulersuisui ukiut sisamakkaarlugit toqqarneqartarput, siulersuisut issiasut januaarip aallaqqaataa 2012 atuutilerput.