Ivalo Egedep sulisunit tatigineqarneq pilerseqqikkusuppaa
KNR-p pisortaata Ivalo Egedep namminerminik pisortatut sulisut isornartorsiuinerat tusaatissatut tiguvaa. - Tamaviaarnassaqaaq, taanna oqarpoq
KNR-p ingerlatsinera sulisullu ulluinnarni atugaat pillugit Epinion-ip attuumassuteqanngitsumik misissuinerani tassani sulisut ingerlatsiviup ingerlanneqarneranI avatangiisit pitsaaginngilaat.
Sermitsiaq.AG-p ullumi siusinnerusukkut allanneratut paasinarsivoq sulisut sisamaagaangata pingasut qullersartik tatiginngilaat, sulisullu affaannaasa suliffimmut tassunga qinnuteqarnissaq inassutigaat.
KNR-p pisortaata Ivalo Egedep isornartorsiut maanna akissuteqarfigaa:
- Kisitsisit saqqummiunnneqartut qanoq isumaqarfigaagit?
- Epinion sulisunik misissuilluni aallartimmsat nalunngilara inerniliineranik atuagassaq sakkortussasoq, pissutigalugu tamatuma aallartinnerani soraarsitsiortoqqammersimagama. Misissuinerullumi takutippaa sulisut 70 procentiisa ingerlatsinera naammaginngikkaat. Pisortatulli uanga erloqinartunik aalajangiisariaqartarpunga. Tamakkualu nuannarineqaatigineq ajorput. Taamaakkaluartoq isumaqarpunga illup iluani tatiginninneq pilerseqqinneqarsinnaasoq.
- Isumaqarpit isorinninneq tunngavissaqartoq, aamma tupaallaatigaajuk KNR-mi sulisut pingajorarterutaasa atorfitsik naammaginngikkaat?
- Ilami KNR sivisuumik sammipiloorneqarnikuuvoq, pisullu tamarmik ingerlatsinermik nalorninartoqartitsilersimapput. Tamanna peqatigalugu teknologimi unammilligassaaloqarpugut, ilarpassua iluarsaanermik pisussaq
Aamma atuaruk: KNR-mi sulisut: Qulaanit aqunneqarneq tatiginanngilaq - tassanissaaq misissuineq tamaat download-ersinnaavat.
- Sulisut atorfimminnik naammaginninnerulernissaat anguniarlugu qanoq iliuuseqarniarpit?
- Epinion-ip inassuteqaatai amerlasuut aallartereersimavavut, taamaattumillu misissuinerup uppernarsarpaa ingerlatsivik ilorraap tungaanut aallartikkipput. Eqqortumut ingerlalersimavugut, suliniutillu pisariaqartut aallartissimavagut.
- Kisitsisit aamma takutippaat sulisut KNR-mi suliffissarsiornissaq inassutigerusuppallaanngikkaat, nalunaarusiarlu inerniliivoq inassuteqarneq 52 procenti, pisortat ingerlatsiviinut allanut, qallunaat ingerlatsiviigaluartunut, appasinnerusut. Suna tamatumunnga pissutaasinnaava aamma KNR-p suliffissatut pilerinarnerulernissaanut qanoq iliuuseqarniarpit?
- Tamanna tamaviaarniassaaq, qullersaqatikkalu aamma suleqatigiinnermut ataatsimiititaliaq peqatigalugit kikkut tamarmik akulerutsinneqarnissaannik piginneqataanissaannillu suliniuteqarnerput nangissavarput, Ivalo Egede oqarpoq.