KNR-mi sulisut: Qulaanit aqutsineq tatiginanngilaq
KNR-mik attuumassuteqanngitsumik misissuinerup Epinion-ip ingerlataata, takutippaa stationeqarfinni sulisut affaannaasa allat ingerlatsivinni atorfissarsiornissaat inassutigaat
KNR-mi sulisut sisamaagaangata pingasut qulaanit aqutsineq naammaginngilaat. Sulisut affaannaasa inassutigerusuppaat allat tusagassaqartitsivimmut atorfissarsiorsinnaasut.
Tamanna takuneqarsinnaavoq KNR pillugu attuumassuteqanngitsumit misissuinermi, Epinion-imit suliarineqarsimasumi, tamanut saqqummiunneqaqqammersumi.
Tatiginninngillat
Nalunaarusiami allassimavoq sulisut quliugaangata arfineq-marluk qullersat nalunaarutaat tatigineq ajoraat. Sulisullu affai sinnilaaginnarlugit isumaqarput qullersat KNR-imut ersarissunik anguniagaqartut. Tamatuma saniatigut sulisut isumaqarluinnarput ingerlatsivimmi aaqqissuusseqqinnerit allanngortiterinerillu qullersat sapissagaat.
- Ingerlatsivimmi KNR-tut ittumi, ukiuni kingullermi nuanniigisanik amerlasuunik aalajangiiffiusimasumi, soorlu soraarsitsinernik sulisunullu politikkimik sakkortusitsinermik, qullersanik naammaginninnginneq annertuujusarpoq. Eqikkaalluni oqartoqarsinnaavoq KNR-mi sulisut piginnaasaminnik ineriartortitserusuttut, misigisaraat qullersat qullersatut suliassanut piukkunnaateqarnerusinnaasut, soorluttaaq qullersaq qaninnerpaaq qullersaanerpaamit naammagisimaarneqarnerusoq, nalunaarusiami allassimavoq.
Naammaginninnginneq
Misissuinerup aamma takutippaa suisut pingajorarterutaannaat isumaqartut suliamik iluamik ingerlannissaannut paasissutissat pisariaqartut pisarlugit. Tamanna peqatigalugu sullivimmi avatangiisit naammagineqanngitsorujussuupput. Misissuinermili ataatsimut inerniliinerup takutippaa KNR-mi sulisut 69 procentiisa suut tamaasa eqqarsaatigissagaanni suliffitsik naammagisimaaraat naammagisimaarluinnaraalluunniit. 52 procentiinnaalli KNR-mut suliffissarsiornissaq inassutigerusuppaatr.
Aamma atuaruk: KNR-p pisortaa kamappoq
Aamma atuaruk: KNR-mi soraarsitsiortornersuaq nutaaq
Sulisunik misissuineq tunngaveqarpoq paasissutissanik, KNR-mit tunniunneqarsimasunik. Misissuinermi sulisut katillugit 75-it peqataapput, tassa sulisut 89-it 84 procentii. Misissuineq ingerlanneqarpoq piffissami 2012-imi novembarip 13-anniit novembarip 28-annut.
KNR-mi sulisut 89-iupput. Agguaqatigiissillugu ukiui 44-uupput, arnat angutillu amerlaqatigiingajapput - angutit amerlanerulaarlutik. Amerlanerpaat, 69 procentit kalaallisut qallunaatullu oqaluttuupput, 21 procentii qallunaatut oqaluttuunerullutik, 11 procentiilu kalaallisut oqaluttuunerullutik.
Nalunaarusiaq tamaat atuaruk uani