IWC-mit aniniarneq eqqunnginnerarpaa
Naalakkersuisut siulittaasuata Kuupik Kleistip Nunanut allanut ministereqarfiup Nuullu akornanni aaqqiagiinngitsoqannginnerarpaa
Arferit angisuut ilisimatuussutsikkut tunngaviit atorlugit piniarneqartarput. Taamatut erseqqissaavoq Naalakkersuisut siulittaasuat Kuupik Kleist, ullumi ministeriunerlu Helle Thorning-Schmidtilu tusagassiortunik katersortitsinermi.
- IWC-mit aninissarput isumaliutigisimanngilarput, Kalaallillu Nunaanni arfanniarnerput ilisimatuussutsimik tunngaveqarpoq. Arfanniarnerlu pillugu nunanut allanut ministereqarfimmik suleqateqarnermut nangiinnassavarput, Kuupik Kleist oqarpoq.
Aaqqiagiinngitsoqannginnerarpaa
Qallunaat tusagassiorfiisa sapaatit akunnerini kingullerni allattarnerisut Kuupik Kleistip nunanut allanut ministereqarfiup Nuullu akornanni aaqqiagiinngitsoqannginnerarpaa.
- Qallunaat naalakkersuisui ataatsimeeqatigeqqammerpavut, nunanullu allanut ministeri tamatumani peqataavoq. Ajornartorsiuteqartoqanngilaq, Kuupik Kleist oqarpoq.
- Akerlianik arfanniarneq pillugu suleqatigiinnissarput nukittorsarniarparput, Naalakkersuisut siulittaasuat oqarpoq.
Nunanut allanut ministereqarfik aamma Piniarnermut Aalisarnermullu Naalakkersuisoqarfik ataatsimut IWC-mut allagarput, Kalaallit Nunaata arfattassiminik 211-niit 221-nut amerliliinera oqaluttuaralugu.
Ministeriuneq Helle Thorning-Schmidt Naalakkersuisullu siulittaasuat Kuupik Kleist ullumi siusinnerusukkut statsministereqarfimmi ataatsimiipput, tamatumani oqaluuseralugit sulisartut nunat allamiut, Suliniussuarnut inatsit aamma IWC.