Siumut: Nioqqutissanik assilisanik eqqussuineq killilerlugu

Nioqqutissanik salloqittaatinik meqqilinnik eqqussuineq killilerneqassaaq, taamatut isumaqarpoq Siumut tunuliaqutaralugu Inatsisartunut ilaasortaq Akitsinnguaq Olsen

Atuisartutut ajornarluinnangajappoq qulakkiissallugu nioqqutissat internettimi tuniniarneqartut ilumut nioqqutissaanersut meqqillit. Ass.: Flickr (david–hwang)

Nunatsinni nioqqutissanik assilisanik tuniniaanerujussuaq pitsaaliorniarlugu Naalakkersuisut qanoq iliuuseqarniarpat? Tamanna Akitsinnguaq Olsenip, Siumut, paragraf 37 naapertorlugu Naalakkersuisunut apeqqutigaa.

- Ullumikkut internettikkut nioqqutissanik pisiniarnissaq killeqanngingajappoq, tamatumani ilanngullugit nioqqutissat meqqillit, atuisartutulli ajornarluinnangajappoq qulakkiissallugu nioqqutissat tuniniarneqartut ilumut nioqqutissaanersut meqqillit. Tamanna peqatigalugu pingaaruteqarpoq atuisartut illersussallugit, aammattaarli nunami pisiniarfiit nioqqutissanik meqqilinnik akikitsunik unammillerneqannginnissaat, nioqqutissanik Kalaallit Nunaannut tikisinneqarsinnaasunik, apeqqunni tunngavilersorpaa.

Tamatuma saniatigut Akitsinnguaq Olsenip paaserusuppaa inuttut nukiit qanoq annertutiginerusut Naalakkersuisut pisariaqartutut isigineraat, nioqqutissanik eqqussukkanik nakkutilliineq annertusarniarlugu, tamatumani ilanngullugit nioqqutissat salloqittaammik meqqillit, aammalu nioqqutissanik eqqussukkanik nakkutilliineq Kalaallit Nunaanni qanoq annertusarneqarsinnaanersoq, tamatumani inuttut nukiit amerlanerusut pisariaqartinneqassammata, taamalu aamma suliassaqarfinni pineqartuni aningaasat amerlanerusut.


Powered by Labrador CMS