Karatemi VM-siilvinnattoq
Hanning Høegh, Australiami illoqarfiit pingaarnersaanni Sydneymi Shotokan Karate-do VM'ertoqarnerani siilvinnappoq
Kalaaleq karatertartoq Hanning Høegh ukiuni arlalinni timersuutiminik aallussisimanngilaq. 2012-imi kingumut timersortaleqqippoq ukiullu naanerani Australiami Sydneymi VM peqataaffigalugu.
Hanning Høegh angutini inersimasuni 18-35-inik ukiulinni unammeqataavoq. Kata unammissutigaa timersortartut 200-t peqataaffigisaat. Unamminerparujussuit ingerlanneqareermata pitsaanerpaat 16-it semifinalimut anngupput. Taakkununnga ilaalluni – Hanning Høegh.
- Semifinalimi ajunngitsumik ingerlatsivunga finalimullu anngullunga. Timersortarfissuaq inunnik ulikkaarpoq nunarsuarmi karatertartut pikkorinnersaat katersuussimallutik, Hanning Høegh oqaluttuarpoq.
- Sapinngisara tamaat pitsaanerpaamik ingerlatsiniarsaraanga finalertunilu peqataasut kingullersaat saqqummiussereermat paasitsaappara normu 2-tut inissillunga. Aallaqqaammut uppererpianngikkaluarpara qungujulaqaangali.
Hanning Høegh pillugu sapaatip akunnerani tullermi AG atuaruk.