Imarsiornermi qitiusumik ilinniarfik nutaaq Nuummi pilersinneqassaaq
Imarsiornermik Ilinniarfik, naalaganngornianut ilinniartitaanerit kiisalu Piniarnermut aalisarnermullu ilinniarfik ataatsimut katinneqassapput
Naalakkersuisut aalajangiuppaat imarsiornermik ilinniarfiit Nuummi nuunneqarnissaat taamaattumik Paamiuni Imarsiornermik Ilinniarfik aamma Uummannami piniarnermut aalisarnermullu ilinniarfik matuneqassallutik.
Ilanngullugu aalajangerneqarpoq piniarnermut aalisarnermullu ilinniartitaanernut tunngatillugu suliffinnik misiliinnerit Sisimiuni ingerlanneqartassasut, pikkorissartitsisarfik Uummannami pilersinneqassasoq kiisalu ineriartornermikkut ajornartorsiuteqartunut sullissivimmik Paamiuni pilersitsisoqassasoq.
Atuarunnaartartut amerlavallaat
Aalajanernermi tunngavilersuutit pingaarnerit ilagaat ilinniarnerminnik taamaatitsiinartartut amerlavallaarnerat, illiniakkanut tunngatillugu naammattunik attavissaqartannginneq kiisalu imarsiornermik inuussutissarsiuteqartunit ujartorneqartartutut pikkorissarnissamik neqeroorutaasartut annikippallaarnerat.
- Ajornartorsiutimmi taaneqartut ilaatigut kingunerisaanik imarsiornerup iluani piginnaasaqarluartunik sulisoqarnissamik aalisariutaatillit umiarsuarnillu assartuisartut kissaataat Namminersorlutik Oqartussanit naammassineqarsinnaasanngillat.
Qiusoqarfissap siunertaa
- Imarsiornermut Ilinniarfiup Paamiunit Nuummut nuunneqarnissaa pillugu Naalakkersuisut aalajangernerat Imarsiornermik Ilinniarfimmi siulersuisuni ilaasortanit tamanit tapersersorneqarpoq. Siulersuisut ilutigalugu nuannaarutigaat Naalaganngorniat ilinniarfiata Nuummi ammaqqinneqarnissaa pillugu Naalakkersuisut aalajangersimammata. Ilinniartitaaneq taanna ukiuni arlalissunni assoralisimasimavoq. Taamatuttaaq ippoq aalisartunut piniartunullu ilinniarfik eqqarsaatigalugu.
- Aningaasaqarneq eqqarsaatigalugu ingerlatat eqitenerisigut iluaqutissiisoqassaaq, isumaqaratta siunissami fagit ataasiakkaat ataatsikkut ingerlanneqarsinnaalluartut. Isumarput malillugu timelærerinik fagit ilaannut ilinniartitsisoqartarnissaq ajornannginnerulissaaq. Umiarsuaatileqatigiit angisuut Nuummi allaffeqarfeqartiterput, taamaanneratigut ilinniartut illinniakkaminnik ingerlatseqqinniarlutik umiarsuarni inuttaaqqaartariaqartartunut praktikkerfissarsisarsinnaanissaat ajornannginnerulissapputtaaq.
Innersuut malippaat
Imarsiornermi ilinniarfiit kattussuunneqarnissaanik aalajangernermikkut Naalakkersuisut imarsiornermi suleqatigiissitap Ilinniartitaanermut Ilisimatusarnermullu Naalakkersuisoqarfimmit pilersinneqarsimasup, imarsiornermik inuussutissarsiuteqartut kiisalu Imarsiornermik Illinniarfiup siulersuisuisa Nuummi imarsiornikkut qitiusumik ilinniarfimmik pilersitsisoqarnissaanik kaammattuutaat taamaasillutik Naalakkersuisunit ingerlateqqinneqarput.