Kommunimi politikeri tunuarpoq
Kattusseqatigiit Partiiat tunuliaqutaralugu kommunalbestyrelsimut ilaasortaq Abel Karlsen nalunaaqqammerpoq partiimit tunuarluni
Kommunimi politikeri naapertorlugu tunuliaquttanit tapersersorneqannginneq partiimit aninerminut pissutaanerpaavoq.
Aalisariutip naalagaa Abel Karlsen 2005-imiilli Kattusseqatigiit Partiiat tunuliaqutaralugu kommunimi politikeriusimavoq, siullermillu kommunalbestyrelsimut ilaasortanngorpoq taamanikkut Ilulissat Kommuneani kingornalu Qaasuitsup Kommuniani, 2009-mi kommunit kattunnerisa kingorna.
- Matumuuna nalunaarutigissavara ippassaq Kattusseqatigiit Partiiannit anigama, Abel Karlsen oqarpoq, maannangaarlu partiimik allamik ilaasortaaffissaminik nassaarsimanngilaq.
- Suli partiimik ilaasortaaffissannik allamik nassaarsimanngilanga, partiinillu allanik oqaloqateqarsimanngilanga. Qingaaffiulli sinnerani kommunalbestyrelsimut ilaasortaassaanga, Abel Karlsen oqarpoq.
Tapersersorneqanngilaq
Taanna naapertorlugu tunuarneranut pissutaanerpaavoq tunuliaqutaminit tapersersorneqannginnini.
- Piffissami sivisuumi misigisimasimavunga partiimit tapersersorneqarnanga. Partiip kommunimi politikeriminik suleqateqarnissaminik neriorsuinini naammassinngilaa. Qaasuitsup Kommunia kommunerujussuuvoq, maanilu kommunalbestyrelsimut ilaasortaalluni suliassat annertuujupput. Taamaattumik tunuliaquttat peqataanissaat pisariaqarpoq, ukiunili kingullerni marlussunni tapersersorneqarnanga misigisimasimavunga, Abel Karlsen nassuiaavoq, sulilu ilisimanngilaa kommunimut qinersinissami tullermi qinigassanngorteqqissanerluni.
- Partiimik kajungerisannik nassaaruma ilaasortanngorlungalu, taava takorloorsinnaalluarpara kommunimut qinersinermi qinigassanngortissallunga, taanna oqarpoq.
Kattusseqatigiit Partiiata Ilulissani immikkoortortaqarfiata Abel Karlsenip partiimit aninera akueraa.