Qallunaat ingerlatsivii parnaarussivimmik sanassapput
Qallunaat entreprenøritut ingerlatsivii tallimat Nuummi parnaarussiviliassap sananissaa unammissutigissavaat
Nuummi matoqqasumik parnaarussiviliortoqarnissaa ukiuni arlalinni pilersaarusiorneqarsimavoq. Maannali qallunaat ingerlatsivii tallimat parnaarussiviup sananissaanut piukkunnartorsiarineqarsimapput.
Suliniummut unamminermi pineqarput tamakkiisumik siunnersuineq, parnaarussiviup nutaap sananerani illussamik titartaasartut, ingeniørit nunamillu ilusilersuisartut suliassaat.
Sanaartugassaq 8.000 m2-inik angissusilik parnaarussanut 76-inut inissaqassaaq, immikkoortoqarfimmi matoqqasumi immikkoortoqarfimmilu ammasumi, assigiinngitsunik isumannaarneqarsimasuni. Tamatuma saniatigut sanaartukkamut ilaassapput suliassaqarnermi atortut, sunngiffimmi atortut parnaarussanullu pulaartunut ini, allaffeqarfik, kiisalu teknikkikkut isumannaatsuunermut atortut assigiinngitsut. Parnaarussiveqarfik ungalulersorneqassaaq qarmamillu unguneqarsimassalluni.
Aamma atuaruk: Parnaarussivik kinguartinneqarpoq
Aamma atuaruk: Parnaarussivik naatsorsuutigisamit akisunerusoq
Aamma atuaruk: Kalaallit parnaarussat takornartatut pineqarput
Aamma atuaruk: Sukkasuumik aaqqiissutissaqanngilaq
Sananissaa 347 milllioner koruuninik akeqarpoq, parnaarussivillu 2017-imi sanallugu naammassisimassaaq. Unamminermi siunnersuutit pinerluuteqarsimasunik isumaginniffimmut tunniunneqarsimassapput kingusinnerpaamik 2013-imi marsip 21-anni.
Ingerlatsiviit taakkua tallimat tassaapput: Schmidt Hammer Lassen Architects, Rambøll Danmark, Cubo Arkitekter, Konsortiet Aurora, C.F. Møller Danmark aamma Fojab Arkitekter
2008-mili Nuummi parnaarussiviliortoqarnialerpoq arlaleriarlunilu kinguartinneqartarpoq, ilaatigut pissutigalugit aningaasat atugassarisat killeqarnerat inissiiffissaatalu isumaqatigiinngissutaanera, maannali ilimanartorujussuuvoq parnaarussivik 2017-imi atulissasoq.