Illumi perulluliornerit amerlavallaaqaat

Akitsinnguaq Olsenip, Siumut, Naalakkersuisut apeqquteqarfigai nakuusertarneq annertusigaluttuinnartoq pakkersimaarniarlugu suliniutinik sunik aallartitsisimanersut

Inatsisartunut ilaasortap Akitsinnguaq Olsenip, Siumut, paaserusuppaa nunatsinni nakuuserneq annertusigaluttuinnartoq pitsaaliorniarlugu Naalakkersuisut qanoq iliuuseqarniarnersut Ass.: Leiff Josefsen

Piffissami kingullermi illumi perulluliornerit nakuusernerillu amerlassusaannik politiit nalunaarutaat tusagassiorfitsigullu allaaserisat tunuliaqutaralugit Inatsisartunut ilaasortap Akitsinnguaq Olsenip, Siumut, paragraf 37 naapertorlugu arlalinnik apeqquteqarpoq Naalakkersuisut sunik suliniuteqarniarnersut, nuna tamakkerlugu nakuusertarneq angerlarsimaffimmilu perulluliortarnerit amerligaluttuinnartut pakkersimaarniarlugit.

- Naalakkersuisut piviusunik sunik suliniuteqassamaarpat nunatsinni illumi perulluliornernik nakuusernernillu ajornartorsiutit, ukioq manna pisut siunissamilu pisussat, pakkersimaarniarlugit, sulinermullu tamatumunnga immikkut inuttut nukissat aningaasallu atugassat qanoq amerlatigisut atorniarneqarpat?, ilaatigut aperivoq.

- Illumi perulluliornerit nakuusernerillu pitsaaliorniarlugit Naalakkersuisut qanoq qaqugulu iliuuseqarniarnersut qulaajarneqaqquvara, kisitsisit kingulliit ajoraluartumik takutimmassuk oqartussaasut sulineranni inuttut nukissat suli amerlanerusut atorfissaqartinneqartut, taamaattumillu pitsaaliuilluni suliniutinut aallartinneqareersimasunut aningaasanik amerlanerusunik atugassaqartitsisariaqaraluarpoq, Akitsinnguaq Olsen oqarpoq.

Powered by Labrador CMS