Manna pissutigalugu taarsiiffigineqarpunga
Ineqarnermut Naalakkersuisup Jens B. Frederiksenip neriuutigaa nalaasaarfimmut oqaluttuassaq tamaat inuit takussagaat - AG-lu pisiaralugu.
Naalakkersuisut siulittaasusata tullianut Jens B. Frederiksenimut ullut sakkortusimapput, AG-p allaaserereeraalu siorna katillugit 60.000 koruuninik taarsiiffigineqarsimasoq pequtit aserorsimanerannut.
Sermitsiaq.AG-gl-imut isorinnittunik takkussuuttoqarpoq.
Ilaaatigut taaneqarsimalluni "Tiaavulu nammineq".
Oqallutilerneq pissutigalugu Jens B. Frederiksenip inuit kajumissaarpai AG sapaatip akunnerani saqqummersoq pisiareqqullugu, tassani pisimasoq tamaat paasisaqarfigisinnaagamikku.
Allaaserisani marlunni ilaatigut atuarneqarsinnaavoq Jens B. Frederiksenip - Nuummi Nigerleq 66-imi naalakkersuisut illuannut suli nuunnani - inissiaatileqatigiiffimmi INI-mi sulisoq erseqqissumik paasitissimagaa kiilerimi qernertunik simerneqartoq.
Tamatumunnga atatillugu INI-mi sulisoq oqarsimavoq tamanna oquunngitsoq, iigarli issumik simertissimasoq.
- Tamannarpiarlu pissutigalugu taarsiiffigitippunga. Illumut oqoqannginnerakkamut isertersimavunga. Oqoqarsimavorli. Tamanna pissutigalugu pequtivut aserorput, ilaatigut nalaasaarfik akisoorujussuaq, ilaqutariillu tamarmik aamma peqqiilliorput, Jens B. Frederiksen nassuiaavoq.
AG-mi sapaatip akunnerani uani saqqummersumi INI-p siulittaasuata Lissi Olsenip nassuerutigaa INI-mi sulisoq kukkusmasoq oqarluni illu - nutarteqqammerneqarsimasoq - oqoqanngitsoq.
- Tamanna pissutigalugu Jens B. Frederiksen taarsiiffigitippoq, taanna oqarpoq.
INI-p taarsiissutit 60.000 koruunit missaanniittut sillimmasiisarfimmit akilersinniarsarai.
Jens B. Frederiksenikkut sapaatip akunnialunnguinnaanni Nigerleq 66-imi najugaqarput, ilaqutariillu Qinngutsinni utaqqiisaa inissiamut nuupput.
- Suliami matumani akiligassaqaaluppoq, inuit paasinninnissaminnut ilisimasariaqagaannik. Taamaattumik kajumissaaqqissavakka aviisi pisiareqqullugu oqaluttuassartaa tamaat paasiniassagamikku. Aamma INI-p, Jens B. Frederiksen oqarpoq.