IA nuussineq pillugu: Paamiunut asissuineq
Paamiuni Inuit Ataqatigiit siulittaasuata Søren P. Lyberthip Imarsiornermik Ilinniarfiup Paamiuniit Nuummut nuunneqarnissaanik Naalakkersuisut aalajangernerat isornartorsiorpaa
Nuummi imarsiornermut centereqalernissaanik taamalu Paamiuni imarsiornermik ilinniarfiup matunissaanik Naalakkersuisut aalajangernerat aalassatsitsivoq, amerliartuinnartullu aalajangerneq isornartorsiorpaat.
Maanna Paamiuni Inuit Ataqatigiit siulittaasuat Søren P. Lyberth sassarpoq oqarlunilu, Ilinniagaqarnermut Ilisimatusarnermullu Naalakkersuisup Palle Christiansenip Imarsiornermik Ilinniarfik matugaa isumaliutigeqqaarnagu, aalajangernerlu nikassaanertut taallugu.
- Paamiuni Inuit Ataqatigiinni paaserusupparput nunami illoqarfiit mikinerit Naalakkersuisut tunulliuteqqinniarneraat Paamiuni imarsiornermik ilinniarfik atorunnaarsillugu, taamaasiornerlu illoqarfimmik nikassaaneruvoq illoqarfimmullu asissuinerulluni, Søren P. Lyberth oqarpoq.
- Imarsiornermik Ilinniarfik ingerlalluarnerpaammat amerlasuut ilinni agaqarfinni angusisarput. Paamiuni Inuit Ataqatigiinni ukiuni arlalinni ilisimasimavarput Ilinniagaqarnermut Naalakkersuisoqarfiup Paamiuni imarsiornermik ilinniarfik pingaartinngikkaa. Aalajangernikkut ilinniarfimmi sulisut saneqqutaarneqarput, Søren P. Lyberth oqarpoq, ilanngullugulu oqaatigalugu Imarsiornermi Aqutsisoqarfik siusinnerusukkut isumaqarsimasoq ilinniarfik ingerlalluartoq.
Siulersuisut akisussaaffeqassapput
- Paasisinnaanngilarput imarsiornermik ilinniarfiup siulersuisuisa allaat ilinniarfimmi sulisut ilinniarfiup matunissaa pillugu toqqaannartumik attaveqarfigisimanngimmatigit. Tamanna Imarsiornermik Ilinniarfimmi sulisunik nikassaaneruvoq, Søren P. Lyberth oqarpoq nangillunilu:
- Sooq qangarsuarli siulersuisunik pilersitsisoqarsimanngila Kalaallillu Nunaanni imarsiornermik ilinniagaqarneq pingaarnerulersillugu, atorfillit ilinniarfimmi qullersat avaqqullugit aqutsisinnagit? Taanna aperivoq.
- Siulersuisut kajumissaarusuppavut akisussaassuseqaqqullugit ilinniarfiullu qullersai suleqatigalugit ilinniarfimmut atortunik pitsaanerusunik misissueqqullugit, inuiaqatigiinnut akilersinnaaqqullugu, Søren P. Lyberth oqarpoq, erseqqissaavorlu borgmesteri tapersersoritsik.
Søren P. Lyberth aamma isumaqarpoq avataani uuliasiornermi ilinniagaqarfiit politikerit eqqarsaatigisariaqaraat ilinniagaqarfiillu Paamiunut inissillugit.