Tv: Sanasunngorniat ilungersuasut
Sanasunngorniat sisamat Aasianneersut ilinniarnerminnut atatillugu sungiusarfissaaleqipput. Sungiusarfissarsinngikkunik ilinnialeraluarnerat asuliinnassaaq
Ukiup aappassaanik sanasunngorniat sisamat Aasianneersut Sisimiuni atuarnerminnik sapaatip akunnerani uani nangitsissapput, silarsuarmili piviusumi suli ilinniarnerminnut atatillugu suliffimmik sungiusarfissarsinngillat. Namminersortut akornanni ilinniarfissarsinngikkunik ilinniarnerminni ajornartorsiulersinnaapput. Ajornerpaamik kingunerisassaa ilinniarnerisa asuliinnarnerat.
John Plambek, Sanaartornermik Ilinniarfimmi ilinniarnermut pisortaq naapertorlugu ilinniartut ilaat suli atuarfimmit suliffimmi sungiusarnertalimmut aaqqissuussami atuarput, pissutigalugu nunatsinni ilinniarnermut atatillugu sungiusarfissamik pissarsiniarneq ajornartorujussuummat.
Atuarfimmit suliffimmut sungiusarsinnaaneq ilinniarnerup ukiuisa siulliit marluk iluanni periarfissaavoq, ilinniartut ukiut marluk ingerlaneranni sungiusarfissamik nassaarsimanngippata ilinniakkaminnik unitsitsisariaqarsinnaapput imaluunniit ilinniarnerminnik piffissaq aalajangeriingaanngitsoq unitsitsigallarlutik taamaanngippat allamik ilinniarfissarsillutik.
Ajornartorsiumminnik oqaluttuartut TV'ikkut aallakaatitami allaasserisap qulaanniittumi isiginnaarsinnaavatit.