Aserorterineq tillinniarnerlu 70.000 koruuninik nalilik
Nukappissat marluk Eqalugaarsunni Pilersuisup pisinniarfiani sapaatip akunnerata siuliani tillinniarnerat aserorterinerallu 70.000 koruunit missaannik naleqarpoq
Sermitsiaq.AG'mi sapaatip akunnerata siuliani allaaseraarput nukappissat marluk 14 aamma 15-inik ukiullit sisamanngornermut unnuaani Kujataani Eqalugaarsunni Pilersuisup pisinniarfiani tillinniarlutillu aserorterisimasut.
Qaqortumi politiit nukappissat aserortigaat tillitaallu maanna misissorsimalerpaat.
- Aserorterineq aamma tillinniarneq 60.000-70.000 koruunit missaannik naleqarput. Tassaapput atortut tillita soorlu qarasaasianut atortut, mobilit, nerisassat, imigassat aamma sikaritsit. Tillitat amerlanerpaartaat nassaarineqarput, Kujataani Politiini immikkoortortami pisortaq politikommissær Bent Ole Kleist, oqarpoq.
- Nukappissat pisinniarfiup atortuisa ilaat soorlu upalungaarsimanissamut assiliivik, atortut, pequttat naterlu aserortersimavaat, Bent Ole Kleist Sermitsiaq.AG'mut oqarpoq.
Ukiukippallaartoq aappaali pineqaatissinneqarsinnaasoq
Nukappissap aappaa 14-iinnarnik ukioqarami eqqartuunneqarsinnaanngilaq, ukiukippallaarnini pissutigalugu.
- Tassunga tunngasoq suliassaq inunnik isumaginnittoqarfimmut ingerlaqqissaaq taakkua aalajangiussissallutik nukappissap qanoq pineqarnissaanut. 15-it sinnerlugit ukiullip qanoq pineqarnissaa suli aalajangerneqanngilaq imaassinnaavorli eqqartuussivimmut tunniunneqartoq, 15-inik ukioqarnera pissutigalugu. Tassunga suliassaq aallaqqaammut inunnik isumaginnittoqarfimmit isumagineqarallarnissaa naatsorsuutigineqartoq Bent Ole Kleist oqarpoq.