Odensemi Kunngit Pingasut ulluat

Juulli sioqqullugu peqatigiiffik Umiaq kalaallisut naalagiarnissamik aaqqissuisoq kunngit pingasut ulluanni Odensemi Kalaallit Illutaat Thomas Kingos Kirke suleqatigiillutik kalaallinut naalagiaqatigiinnermik aaqqissuussipput.

Kunngit Pingasut ulluannik nalliussisarneq Danmarkimi annerusumik isumaarunnikuusoq Kalaallit Nunaannituulli nalliussineqassanani. Taamaattoq qularutigineqassanngilaq Thomas Kingos Kirkemi takkuttorpassuit juullip ataqqinartumik naggaserneqarnissaa ataatsimut isumaqatigiissutigigunarpaat, soorunalimi periarfissaq atorlugu naalagiaqatigiipput imminnullu ukiortaami pilluaqqoqatigiillutik.

Ukiut aappassaani biskop Sofie Petersen, naalagiarnermik ingerlatsisuuvoq.

Biskop Sofie Petersen Danmarkimiippoq biskorpit ataatsimeeqatigiinnissaannut aammalu dronningip ukiortaami pilluaqqusineranut peqataajartorluni.

Odensemi kalaallit naalagiartarneri soqutigineqartaqaat. Inuit ilaatigut ungasissumit aggerlutik peqataajartortarput taamaattumik kunngit pingasut ulluanni oqaluffik ulikkaangajalluinnarluni.

Soorlu juulli sioqqullugu naalagiaqatigiinnermi nerliiviliartoqartoq aamma kunngit pingasuni nerliiviliartoqarpoq erinarsoqatigiit Umiaq nuannerluinnartumik erinarsortoralugit.

Neriorsuisinnaanngilaq
- Neriorsuutigisinnaanngilara Odensemi kunngit pingasuni naalagiartitsisarnissara ileqqunngoriartornersoq, biskop Sofie Petersen kingorna oqaluffiup initaani kaffisoqatigiinnermi oqarpoq.

- Taamannak pisoqassappat allamik pissuteqarlunga Danmarkimiittariaqartassaanga.

Sofie Petersenip Odensemiinnermini ilaagit Nunat avannarliit illussaat Odensip umiarsualiviani sananeqaleruttortoq alakkarpaa.