Toqutsinermi unnerluussutissaq piariilerpoq
Siorna februaarimi Nutaarmiuni pingasunik toqutsinermik sisamanillu toqutseriarnermik suliassap qaqugu eqqartuussivikkoortinneqarnissaa qanittukkut aalajangerneqassaaq
Ilimanarpoq Kunuunnguaq Korneliussen, siorna pingasunngornerup februaarip 8-ata unnuaani pingasunik toqutsisoq sisamanillu toqutseriartoq qanittukkut Eqqartuussivimmi eqqartuunneqassasoq.
Tassami unnerluussutip piareernissaanut paasissutissat ikittuinnaat Rigsadvokatimit akuerineqartussat amigaatigineqarput.
Taamatut KNR-p radioavisianut paasissutissiivoq Kalaallit Nunaanni Politimestereqarfimmi unnerluussisuuneq Helle Olesen.
- Suliassap nassiunnissaanut paasissutissat ikittuinnaat amigaataapput. Tassaapput pisimasumut atatillugu taarsiiffigineqarnissamik piumasaqaateqarnissamut paasissutissat, Helle Olesen oqarpoq.
Pisup alianartup, Kalaallit Nunaamiunik tamanik tupatsitsisup, kinguneranik ilaatigut Naalakkersuisut siulittaasuata Kuupik Kleistip ukiortaami ilassinninnissani taamaatiinnarpaa, qimataasullu misiginneqatiginiarlugit nalunaaqutaq 12.00 minutsini marlunni Kalaallit Nunaanni tamarmi nipangersimasoqarpoq.
Taamanikkut 22-nik ukiullip Kunuunguaq Korneliussenip aanani 75-inik ukiulik, pania 31-nik ukiulik ernutaalu arfineq-pingasunik ukiulik aallaallugit toquppai. Aamma sisamariarluni toqutseriarsimalluni nassuerutigaa.
Pisimasoq, politiit iliuuseqarnerat il.il. allaaserisat 42-t Sermitsiaq.AG-p linkimut ataatsimut katersorpai. Uani atuarsinnaafatit: Takussutissaq: Nutaarmiunit allaaserisat tamarmik