Sulinermi pissutsit sammineqarlik, qujanaq
2013-imi unammilligassanut pitsaasumik anguniakkatut oqaatigineqartut atorfillit kattuffiata siulittaasuata nuannaarutigai. Pisortani sulisut suliamikkut tatineqartorujussuupput
- Nuannerpoq tusarlugu kommunersuit sisamat ukiut sisamat ingerlaneranni taama angusaqareertigisimasut, minnerunngitsumilli tusarlugu suli unammilligassarpassuaqartoq, kommuninut nutaanut nunap immikkoortuani innuttaasunik sullissinermi immikkoortutut tamakkiisumik ingerlatsisinnaajumalluni.
Taamatut allappoq Atorfillit Kttuffianni, AK-mi, siulittaasoq Erik Hammeken, KANUKOKA-mi Martha Abelsenip ukiortaani oqaaseqaataanut qisuariaatitut.
- Ukioq manna ukiortaami oqaaseqaatiga aallartissallugu naleqqutissaaq KANUKOKA-p siulittaasuata Martha Abelsenip ukiortaami oqaaseqaataanit issuaallunga.
- Aap, 2009-mi januaarip aallaqqaataani kommunit kattunneqarnerannit maanna ukiut sisamat siulliit qaangiupput. Taamaattumik naleqquppoq kingumut qiviassalluni. Issuaaneq naavoq.
Erik Hammeken isumaqarpoq kommunit kattunnerisa kingunerisimagaa sulisunut tamanut suliatigut tatineqarnerup annertunerulernera, aammalu nuna sullitaq anginerujussuanngorsimasoq.
- Tamanna ajoraluartumik sulisunut tamanut timikkut, aammattaarli tarnikkut, pitsaanngitsorujussuarmik sunniutetqarpoq. Tamatumunnga pissutaavoq pisortat suliassanik nutaanik sulisunut nalaatsornerinnarmik agguaassisarnerat, kiisalu sulisunut atorfiit suliassallu suunerannik allassimasoqannginnera, Erik Hammeken oqarpoq tikkuarlugulu 2010-mi Atorfillit Kattuffiata ataatsimeersuarnerani ajornartorsiut tamanna annertuumik oqaluuserineqarsimasoq.
Tamanna tunuliaqutaralugu Atorfillit Kattuffiata kommunersuarni tamani qullersat 2011-mi 2012-milu ataatsimeeqatigisarsimavai, ajornartorsiut tamanna aaqqiissuteqarfiginiarlugu. Kommunersuarni sisamani tamani qullersat neriorsuipput ajornartorsiut aaqqinneqassasoq, sulisunullu tamanut atofinnut suliassanullu allaaserisat naammassiniarlugu sulisoqassasoq.
- Taamaakkaluartoq Atorfillit Kattuffiat ilaasortanit nalunaarfigineqartuarpoq kommunersuarni sisamani ajornartorsiut tamanna suli atuuttoq. Tamassuma takutiinnarpaa kommunini qullersat ataatsimiinnerni neriorsuutitik naammassisimanngikkaat. Taamaattumik nuannaarutigaarput KANUKOKA-p siulittaasua nalunaarmat siunissami suli unammilligassarpassuaqartoq, erniuutigaarpullu ajornartorsiut tamanna ilaasoq aaqqinneqassallunilu. Sulisunut atugassarisanik akuersaarneqarsinnaanngitsunik ajornartorsiut kommuniniinnaq atuutinngilaq, aamma Namminersorlutik Oqartussani atuuppoq, Erik Hammeken erseqqissaavoq.
Taanna oqaluttuarpoq assersuutigalugu Akileraaruseriffik Nuuk-mi akileraarutinut akitsuutinullu siunnersortinik arfineq-marlunnik sulisoqartoq. Tamakkuna allaffinni mikinerusuni marlunni sulipput, pingasut ataatsimi sisamallu aappaani. Tamarmik ataatsikkut innuttaasunit saaffigineqaraangata inunnut paasissutissat isertuussat allanit susassaqanngitsunit tusarneqartarput.
- Pissutsit taamaattut akuersaarneqarsinnaanngilluinnarput aaqqinneqassallutillu. Suliffeqarfimmi sumiluunniit sulisut suliffeqarfiup inuttut aningaasaatigai, paarineqartussat. Taamaattumik kissaatiginersaavarput tamanna ukiumi nutaami nassuerutigineqassasoq, Erik Hammeken oqarpoq.