Qeqertarsuup Tunua: Bell 212 tatiginarpianngilaq
Qeqertarsuup Tunuata nutaamik timmisartuussiffigineqalernera ernumanartinneqarpoq, pissutigalugu helikopteri Bell 212 silarlutaartillugu ajornartorsiortarmat
Kujataaniinnaanngitsoq helikopterip S-61-ip atorunnaarneqarnerata kingorna kinguaattoornerit taamaatitsiinnarnerillu naammagineqarunnaareerput. Naluneqanngitsutut S-61-it atorunnaarnerisigut Kujataani timmisartunut ilaasut ukiut nikinneranniilli helikopteri mikinerusoq Bell 212 atulerpaat.
Taamaapportaaq Qeqertarsuup Tunuani ilaasunik angallassineq, tamannalu ernumanartoqartinneqarpoq Kujataani angallannermi pissutsit ajorluinnarnerat pissutigalugu. Naammaginninngitsut ilagaat Inatsisartunut ilaasortaq Knud Fleischer, Kattusseqatigiit Partiiat, taanna isumaqarluni akuerineqarsinnaanngitsoq Bell 212-ip saperngujanerujussua.
- Tusarsimavara sisamanngormat ualikkut timmisartornissaaq taamaatiinnarneqarsimasoq taarpallaanera pissutigalugu. Akuersaarneqarsinnaanngilluinnarpoq helikopterinik taama saperngujatigisunik atuinissaq. Pingaartumik maani kaperlatsillugu, Knud Fleischer Sermitsiaq.AG-mut oqarpoq.
Atuaruk "Bell 212-it ajornartorsiutaasut Air Greenlandip nassuerutigaa"
Sullissinissamik isumaqatigiissutit nalileqqinneqassapput
Taamaattumik Knud Fleischer isumaqarpoq pissutsit maanna atuuttut ersarissumik takutikkaat sullissinissamik isumaqatigiissutit nalileqqinneqartariaqartut.
- Sullissinissamik isumaqatigiissutit innuttaasut naatsorsuutigisaannik naammassinninngillat nalilersoqquttariaqarlutillu. Maannangaaq takusinnaareerparput atorsinnaanngitsut. Kujataani maanilu Qeqertarsuup Tunuani, taanna oqarpoq.
- Ajornartorsiutaasorli tassaavoq angallannermut aningaasanik amerlanerusunik immikkoortitsisoqanngippat nunami angallanneq pitsaanerulersinneqarsinnaanngilaq, Knud Fleischer oqarpoq.
Atuaruk "Helikopterinut pakatsineq: Kikkut tamarmik assatik asappaat"
Aturuk "Kujataani angallannermi atukkat sussaanngitsut"
Taamaaatitsineq ataaseq
Air Greenland nassuiaavoq Qeqertarsuup Aasiaallu akornanni ataasiarluni taamaatitsisoqarsimasoq:
- Sisamanngormat Qeqertarsuup Aasiaallu akornanni timmisartuussineq ataaseq taamaatiinnarneqarpoq. Tamatumunnga pissutaavoq ullup ingerlanerani kinguaattoortarsimanerit Qeqertarsuup Tunuani putsut appasinnerat apineralu. Taamaatsillugu tunngaviatigut Bell 212 timmisinnaavoq, ilanngulluguli taarmat timminissamut isumannaatsuunissamut killissaq appasinneruvoq. Taamaattumik apinera taarnermik ilallugu ajornartorsiutaavoq. Tamannattaaq pissutigalugu tallimangornermi knguaattoortoqarsimavoq, Niels C. Frederiksen, Air Greenlandimi ingerlatsinermut pisortaq oqaluttuarpoq, tikkuarpaalu Bell 212 S-61-itulli piginnaasaqanngitsoq, tamannalu Air Greenlandip isertuussimanngikkaa.
Iluaqutissat ajoqutissallu
- S-61-illi aatorsinnaajunnaarsimapput, B-212-illu aningaasaqarnikkut aaqqiissutissaasimapput. Siusinnerusukkullu nalunaarutigineqartutut taanna S-61-imut sanilliullugu iluaqutissartaqarlunilu ajoqutissartaqarpoq. Aallarnerit arlallit toqqarneqarsinnaanngorput, Qeqertarsuullu Tunuanut atatillugu toqqaannartumik sumunngarfissat arlallit toqqarneqarsinnaallutik. Kisiannili aap, S-61-imut sanilliullugu silamit killilersorneqarneruvoq, Niels C. Frederiksen nassuiaavoq.