ICC: Piniarnermut pisinnaatitaaffiit pingaartinneqarnersaapput
ICC-p ukioq 2012 ukiutut aalajangiisuusutut taavaa. - Ukioq allanngorfik, ICC-p siulittaasua Aqqaluk Lynge ukiortaami oqaaseqaammini oqarpoq
ICC-p, Inuit Circumpolar Conference-p, siulittaasuata ukioq 2012 kingumut qiviarlugu isumaqarpoq ukiumi pisut pingaarnersarisimagaat ICC-p Tjukotka-mut tikeraarnera.
- Tikeraarnitsinni russit oqartussaasui naapippavut aammalu Tjokotkap Guvernør-ianik aamma Tjokotkami nunap inuiisa kttuffiannik suleqatigiinnissamik isumaqatigiissut nutarsarlugu. Taamaasilluni russit inuit 1700-t ICC-mi suleqatigiinnermi peqataanerisa nanginnera qulakkeerneqarpoq, Aqqaluk Lynge oqarpoq.
Ukioq 2012 ICC-mut arlalitsigut allanngorfiuvoq, pingaartumik ICC-p aatsitassanut inatsimmut sunniuteqarnera, Nunatsinni aatsitassarsiornissamut aqqutissiuussisumik:
- Tamanna akisussaassutsimik annertuumik kinguneqarpoq, taamaattumillu suliap oqartussaaqataasumik ingerlannissaanik sulineq ICC-p nanginniarpaa, soorluttaaq nunamut pisuussutaanullu pisinnaatitaaffivut qulaajartikkusukkivut, Inuit Pisinnaatitaaffii naapertorlugit Namminersorlutik Oqartussat kalaallinik inuiannik inuiattut akuerinninnerat tunngavigalugu. Taamaattumik aningaasaateqarfinnit namminersortunit tapersersorneqarluni ICC 1014-imi apriilip naanerata tunganut tusarniaanerni peqataasarsinnaavoq.
Tamatumunnga atatillugu ICC-p siulittaasua oqarpoq ICC-mut aalajangiisuusoq suliffissuaqarfinnut suliniuterujussuarnut amerlasuunut pilersaarutigineqartunut innuttaasut piviusunik tamakkiisumillu paasissutissinneqarnissaat.
- Aalajangiisuulluinnarpoq innuttaasut pisinnaatitaaffiisa pingaartinneqarnerunissaat. Kalaallit sumiiffinni, maanna ingerlatsivissatut pilersaaruteqarfinni tamatigut piniarlutillu aalisartarsimapput. Pisinnaatitaaffiit tamakkua sumiiffinni ataasiakkaani killilerneqassapput. Tamanna peqatigalugu suliniutitigut tamakkunatigut pinngitsoorani pinngortitap mingutsinneqarnissaa ersissutigaarput.
- Taamaattumik pisariaqarpoq innuttaasut pisinnaatitaaffitsik ilisimassagaat illersorsinnaassallugillu. Taamaattumik inuit pisinnaatitaaffiinik, avatangiisinik illersuinermik nunallu tamalaat selskabersuisa nunani allani ingerlatsinerannik samminninnerput nangissavarput, taamaasilluni innuttaasut piviusunik assigiinngisitaarnerusumik takunnissinnaaqqullugit, Aqqaluk Lynge oqarpoq.