Kujataani angallannermi atugassarisat sussaanngitsut

Naalakkersuisut siorna aalajangerput Air Greenlandip helikopterii S-61-it atorunnaarsikkiartuaarneqassasut. Tamatuma kingorna helikopterit mikinerusut Bell 212-t ukiortaamiit atorneqalissallutik. Qaqortormiorlu naapertorlugu manna tikillugu Air Greenlandip piffissat malikkuminaatsissimavai, taamaatitsiinnarnerit kinguaattoornerillu pissutigalugit.

- PIngasunngormat januaarip aappaanni kinguaattoornerpassuaqarpoq sakkortuumik anorlernera pissutigalugu. Aqaguani Narsarsuarmukartussanit 20-nit 18-it taamaatiinnarneqarput, tamannalu aamma ippassaq Air Greenlandip quppernerani nittartakkami takuneqarsinnaavoq, Qaqortormiu Pilu Nielsen oqaluttuarpoq, ilanngullugulu oqaatigalugu Qaqortormiut angallannikkut maanna atugassarisat naammaginngilluinnaraat.

Atuaruk "Piffik pingaarutilik qaangiuppoq"

Assit takukkit uani "Naggataamik atorneqarnerani katittut"

Qatsunnartoq naammaginanngitsorlu
- Angallannikkut atugarisat ajorseriartut innuttaasorpassuit oqaluuseraat, soorunamilu isumaqarlutik tamanna qatsunnartoq naammaginaranilu. Innuttaasullu amerlasuut naatsorsuutigisimavaat S-61-it atorunnaarsinnerisigut kinguaattoornerit taamaatitsiinnarnerillu amerlanerulissasut, tassa anorlerpallaalaarpat Bell 212-t timmisinnaanngimmata, S-61-it sapersimanngisaannik, S-61-illu sapigaqannginnerupput anorlingaatsiaraluarpallu timmisinnaallutik, Pilu Nielsen Sermitsiaq.AG-mut oqarpoq.

Taannalu malillugu Kujataamiut nalunngilluarpaat timmisartukkut angallannermi maanna atugarisanut Air Greenland pisuunngitsoq.

- Air Greenland atugassarisani atorlugit sapinngisaminik iliuuseqarpoq, Pilu Nielsen tikkuaavoq.

Aallarput nassatatik qimallugit
Sisamanngormat Pilup ikinngutaasa ilai iluatsitsillutik aallarput, nassataalli helikopterimi inissaqarsimanngillat.

- Soorunami isumaqarput qasunartoq nassatatik suli tigusimannginnamikkit, nalunaarfigineqarsimappullu immaqa aatsaat sapaatip akunnerani tullermi nassatatik tigujumaaraat, Pilu Nielsen oqarpoq ilanngullugulu oqaatigalugu AirGreenland ullormut 500 koruuninik akiliuteqartoq nassatat ilaatinneqannginnerannut taartissatut.

- Allanik ilisarisimasaqarpunga maani juullisioriartoreerlutik Danmarkiliartussanik. Taakkua aallanngitsoorput aatsaallu sapaatiuppat aallassallutik, sila ajunngippat. Ullumi suliartortussaagaluarput, Pilu Nielsen oqaluttuarpoq, taassumalu siunissaq ernumagisorujussuuvaa.

- Kujataamiunut uagutsinnut toqqissisimananngilaq. Naatsorsuutigineqarsinnaanngilaq timmisartumikm angallassineq tamakkiisumik ingerlassasoq, qanormitaavalu angallatilerutttorfimmi issava, inuit immaqa sivisuumik ileqqaarsimallutik feriarlutik aallarsinnaanngippata? Angallanikkut atugarisat pitsaanngitsut pissutigalugit feriarnerat aserorsinnaavoq, Pilu Nielsen oqarpoq.