Qallunaat suliniutinut angisuunut atatillugu sulinerat ernumanarpoq
Siumumiit Doris Jakobsenip qallunaat suliffeqarnermut ministeria oqaloqatigerusuppaa isumaqarami qallunaat oqartussaasuisa piareersimasimannginnerat toqqissisimananngitsoq
Siumut sinnerlugu Folketingimut ilaasortap Doris Jakobsenip Danmarkimi suliffeqarnermut ministeri Mette Frederiksen Socialdemokratineersoq oqaloqatigerusuppaa.
Tamanna pivoq suliffeqarnermut ministerip sullivinnik nakkutilliineq suliniutinullu angisuunut tunngatillugu apeqqutinut Doris Jakobsenip novembarimi apeqqutaannut akissutai peqqutigalugit.
Læs "Doris: Hvad med lov og orden?"
Siumumiit Folketingimut ilaasortap ernummatigaa nunatsinni suliniutinut angisuunut atatillugu qallunaat oqartussaasui naammaginartumik piareersarsimanngimmata.
Ministeri decembarimi Doris Jakobsenip sullivinnik nakkutilliisoqarfiup assersuutigalugu London Miningip sulilerneratigut sulinerunissaq piareersarfigisimaneraanut apeqquteqarneranut akissuteqarpoq.
Annikitsumik piareersarsimapput
Ministeri maannakkut akivoq namminersorlutik oqartussat politiillu taamaallaat oqaloqatigineqarsimasut, kiisalu Danmarkimi oqartussaasut ikiortiserineqarsinnaasut.
Ministerip akissutaatigut takuneqarsinnaavoq aamma tassuunaatigut naammattumik piareersartoqarsimanngitsoq suliniutillu angisuut pillugit inatsisip Doris Jakobsen naapertorlugu sukkavallaamik akuerineqarsimasoq.
Tassunga atatillugu Doris Jakobsen oqarpoq:
- Apeqquteqarpunga neriuutigalugu Danmark suliniutit angisuut aallartippata akisussaaffigisaminut pitsaanerusumik piareersarsimassasoq. Aamma taamatut inatsisinik atortitsinermut ministerimut apeqquteqarpunga, taannali suli akinngilaq. Nikallornarpoq takullugu tigussaasumik sunnguamilluunniit piareersartoqarsimannginneranik isikkoqarmat, aningaasaliisoqarsimananilu amerlanerusunik, suliniutit aallartippata pisariaqartumik.
- Taamaattumik tupigaara naalakkersuisooqatigiit suliniutit angisuut pillugit inatsit taama tuaviuutsigimmassuk, Doris Jakobsen oqarpoq, tuaviortumillu suliffeqarnermut ministeri oqaloqatiginiarlugu qanoq Kalaallit Nunatsinni qulakkeerneqarsinnaanersoq aatsitassarsiorfiit ingerlalerpata sullivinnik nakkutilliisoqarfiup suliassaqarpallaalinnginnissaa.