Nunatta isigineqarnera aamma pineqarpoq
Danmarkimut kinguneqarsinnaaneratut Kalaallit Nunaata isigineqarnera aamma pineqarpoq, Kalaallit Nunaannut immikkut ilisimasalik oqarpoq
Ullumi siusinnerusukkut saqqummiunneqarpoq nunanut allanut ministerip Villy Søvndalip, SF, ernumanartoqartikkaa, Kalaallit Nunaata nunani tamalaani pisassiissutit ataqqinagit 2013-imut imminut angisuunik arfattassissimanera, Danmarkip Den Internationale Hvalfangstkommssion-imut, IWC, peqataaneranut kinguneqarsinnaasoq.
Tassami Naalakkersuisut nammineq arfattassiinerat kinguneqarnerlussinnaavoq. Danmarkimuinnaanngitsoq. Aammattaarli Kalaallit Nunaannut.
Taamatut naliliivoq Lise Lyck, cand. polit. aamma Copenhagen Business Scool-imi centerimi pisortaq. Taassuma Kalaallit Nunaat immikkut sammisaqarfigaa.
Atuaruk "Arfanniarnitta qallunaat isigineqarnerat ulorianartorsiortippaa"
Atuaruk "Nunatput imminut arfattassippoq"
Pissusilersornermut malittarisassat allassimanngitsut
- Nunani tamalaani inuiaqatigiinni pissusilersornerit ilaat isummerfigineqartarput. Tamatumani nammineq aalajangiinikkut imminut qaffatsittoqartarpoq. Taamaattumik taamaasiornikkut nunani tamalaani ataqqineqarneq annaaneqarsinnaavoq, taanna dr.dk-mut oqarpoq.
Tamanna peqatigalugu isumaqarpoq Kalaallit Nunaat kingullermiunngitsoq nammineerluni aalajangiisoq:
- Tamanna siusinnerusumut sanilliullugu qaqutigoortuuvoq, tamannali Kalaallit Nunaata namminiileraluttuinnarneranut namminersortuunerminillu takutitserusunneranut ilaavoq, tamanna pissarsiarimmagu 2009-mi namminersornermut inatsisikkut, Lise Lyck dr.dk-mut oqarpoq.
Siorna IWC-mi amerlanerussuteqartut akerliullutik taasipput, Naalakkersuisut angisuunik arfattassat 2013-imi 2011-niit 221-nut amerliniarmatigit. Taamaattumik Naalakkersuisut ukioq manna angisuunik arfattassanik namminneq aalajangiipput. Arfattassallu 221-upput.