Sulisitsisut Peqatigiiffiat: Allat akisunaaralutik kukkussutaat ilinniarfigisariaqarpavut
Kalaallit Nunaanni Sulisitsisut Peqatigiiffiata erseqqissarpaa nunatsinni aatsitassanik piiaanermi nunat allat misilittagaat isiginiartariaqarivut
Nunatsinni Sulisitsisut Peqatigiiffianit ukiortaami oqariartuummi pisortap Brian Buus Pedersenip siulersuisunilu siulittaasup Henrik Sørensenip oqariartuutigaat nunatsinni siunissami aatsitassanik piiaanermi sianiinnaarneqannginnissarput anguniarlugu tamaviaartariaqartugut.
- Allat kukkuneri naleqaqisut ilinniarfigisariaqarpagut, nunatullumi inukitsutut taama ittunik kukkunissatsinnut akissaqanngilagut. Aammaarlunga erseqqissarusuppara suliap ingerlanerani sapinngisamik siusissukkut nammineq suliffeqarfiutitta peqataatinneqarnissaat apeqqutaaqataalluinnarmat. Tamatumani pingaarutilik tassaavoq piffissaq ungasissoq isigalugu, ilisimasat piginnaasallu ineriartortinneqarnissaat, taamaalillutik nunaqavissut suliffeqarfiutaasa ukiuni tulliuttuni aatsitassarsiornermi aningaassaliissutinut atatillugu suleqataasinnaanissaat qulakkeerniarneqassammat.
- Piginnaasanik ineriartortitsinngikkutta inuussutissarsiutinik suliniutit nassatarisaannik atugarissaarnikkut siuariarunnanngilagut, taakkuuppummi inuiaqatigiit atugarissaarnissaannut tamatta kissaatigisatsinnut akileeqataasussat, Brian Buus Pedersen aamma Henrik Sørensen allapput erseqqissarlugulu 'atugarissaarneq inuunerinnerlu anguneqarnavianngillat piginnaasatigut ineriartortitsoqanngippat. Siuariartortoqarnavianngilaq isumaliutigilluakkanik nutartiterisoqanngippat'.
2025-mut takorluukkat 2013-mi pingaarluinnartinneqassapput
- GA-miit qilanaaraarput nutarteraluni allanngortiteriniarnerit Naalakkersuisut 2025-imut anguniagaannut piviusunngortitsisussat 2013-imi pingaartinneqarnerpaammata. Anguniakkat tamakku tamakkiilluta tapersersorusuppagut, suliallu ingerlanneqarneranut atatillugu pingasoqiusamik isumaqatiginninniarnerit aallarteqqinnissaat qilanaaralugit
- Naalakkersuisut anguniagaat ”Siunissarput – illit uangalu akisussaaffipput – 2025-ip tungaanut”. Anguniagaq taanna aatsaat piviusunngorsinnaavoq inuussutissarsiutitigut ingerlatsineq aningaasarsiornikkut pitsaasumik ingerlappat. Taamaammat GA-miit kaammattuutigerusupparput ataatsimoornissarput, suliniutinullu angisuunut suliaq siulleq pitsaasumik maligassiissasoq aammalu anguniakkap timitalerlugu piviusunngortinnissaanut tikkuussisuussasoq, Brian Buus Pedersen aamma Henrik Sørensen ilaatigut allapput.
Sulisitsisut ukiortaami oqariartuutaat tamakkiisoq qallunaatut kalaallisullu ilanngissami kingulianiittumi atuarneqarsinnaapput