Arfanniarnitta qallunaat tusaamanerlunneqartilersinnaavai
Nunat tamat akornanni arfattassiisarnerup avataani kalaallit arfattassiinerat Danmarkip IWC-mi ilaasortaaneranut kinguneqarsinnaavoq, nunanut allanut ministeri Villy Søvndal mianersoqqusivoq
Suna Danmarkimit pingaartinneqarnerussava: Nunat tamat akornanni suliniaqatigiiffimmut ilaasortaaneq imaluunniit naalagaaffeqatigiinneq?
Apeqqut pingaaruteqalerpoq kalaallit nunat tamat akornanni arfanniarnermut suliniaqatigiiffik IWC akimorlugu nammineq arfattassanik aalajangiimmata, Kristeligt Dagblad allappoq.
Læs "Grønland fastsætter hvalkvoter"
Qallunaat aviisiat allappoq nunanut allanut ministeri Villy Søvndal SF-imeersoq kalaallit IWC akirmorlugu aalajangiinissaannik mianersoqqusimmat, decembarimilu naalakkersuinikkut ataatsimiititalianut arlalinnut allalluni Danmarkip suliniaqatigiiffimmi ilaasortaaginnarnissaa annertuumik ernummatigigini.
Erseqqissarpaa qallunaat kalaallit soqutigisaannik isiginniarnissamut piumassuseqarluartut tullianilu IWC-p ataatsimiinnissaanut aatsaat 2014-mi pisussamut nutaamik siunnersuuteqarnissani kissaatigalugu.
Tamatunga tungaanut nunanut allanut ministereqarfik naapertorlugu kalaallit pisaassaasa qummut killilernissaannik 'isumaqatigiissuteqarallarnissaq' pisariaqarsinnaavoq. Nunanullu allanut ministereqarfimmit oqaatsit sakkortuut atorlugit mianersoqqussutigineqarpoq kisermaassilluni isumaqatigiissuteqarneq nunanit tamalaanit annertuumik isornartorsiorneqarsinnaasoq, tamannalu kunngeqarfimmut tamarmut tuttussaalluni, Kristeligt Dagblad allappoq.
Siorna IWC akerliliilluni taasivoq naalakkersuisut 2013-mi arfernik angisuunik pisaassat 211-miit 221-imut amerliniarmassuk. Naak ilaatigut IWC-mit ilisimatuussutsikkut immikkut ilisimasallit nalileraluaraat kalaallit pisaassaasa allanngortinneranni arfeqassuseq eqqorneqarnavianngitsoq nunat ilaasortaasut arlallit isumaqarput arfattassanik amerliliinermi kalaallit inuussutissarsiutaat pineqanngitsoq, takornarianulli neriniartarfinnullu tunnganerulluni.
Sermitsiaq.AG-mit Inuit Aqatigiit sinnerlugit Folketingimi ilaasortaq Sara Olsvig Siumullu sinnerlugu ilaasortaq Doris Jakobsen oqaaseqartinniarpavut.