Ingeniørenip Antuup isornartorsiuinera tunngavissaqanngissoraa

Atuagassiap Fagbladet Ingeniørenip allaaserisaq avatangiisit pillugit akisussaasumut Anthon Frederiksenimut tunngasoq aalajangiusimavaa, tassani Antuup nunatta Danmarkillu akornanni avatangiisit pillugit isumaqatigiissut nutaaq isornartorsiorlugu

Tunu sakkutooqarfiusimasoq Ikkatteq saviminikoorfittut ippoq. Foto: Ole G. Jensen

Atuagassiap Ingeniørenip kiisalu nunamut namminermut, pinngortitamut avatangiisinullu naalakkersuisup Anthon Frederiksenip Kattuseqatigiit Partiianneersup oqaasii imminnut assortuupput.

Sisamanngormat Anthon Frederiksenip maani Sermitsiaq.AG-mi qallunaat atuagassiaa akerlilerpaa, Ingeniøren imminut tunngasumik allaaserisaanut isornartorsiorlugu, Ingeniørenillu aalajangiusimallugu Anthon Frederiksen eqqortumik issuarsimanerarlugu, taamaattumillu isornartorsiuinissamut tunngavissaqanngitsoq.

Taama tusagassiortoq Birgitte Marfelt Ingeniørenimi allaaserisamik "Grønlandsk minister om sin egen miljøaftale: Ingen garanti for oprydning" allattoq oqarpoq.

Tamanna pivoq Sermitsiaq.AG-mit Anthon Frederiksenip isornartorsiuinera saqqummiunneqareersorlu, Antuut allalluni allaaserisaq 'eqqunngilluinnartuusoq. Ingeniørenimut taama oqarsimanngisaannarpunga. Kukkusumik issuaaneruvoq, ingammik qulequtaa eqqarsaatigalugu. Isumaqatigiissut isornartorsiunngilara'.

Læs "Anthon går i rette med Ingeniøren"

Læs "Anthon kritiserer miljøaftalen"

Læs "Ny miljøaftale rydder op efter fortidens synder"

Taamaattumik allaaserisaq eqqortuuvoq
- Birgitte Marfelt, allaaserisami oqaatsitit aalajangiusimavigit?

- Aap. Anthon Frederiksen issuaanertulli oqarpoq, tassalu isaasalerlugu. Allaaserisaq (qulequtaq, aaqq.) eqikkaaneruvoq toqqaannartumik issuaanerunani. Taamaattumik isaasalerneqarsimanngilaq, taamaattorli Antuup allaaserisami oqaaseqarneratut illuni.

- Isumaqarpunga isornartorsiuinerata sammivilernera uissuummissutigisimagaa ataatsimoortumillu naammagisimaarinninneq pinnagu, tusagassiuutitigummi nalunaarummi imminerminiit illersornissamullu ministerimit NIck Hækkerupimit oqariartuutitut innani, Birgitte Marfelt nassuiaavoq.

Allaaserisaq pineqartoq Ingeniørenip juullikkunni allaaseraa, tassani Anthon Frederiksen avatangiisit pillugit isumaqatigiissummi Danmarkip Kalaallit Nunaanni sakkutooqarfiusimasunik saliinissamut akiliisussatut pisussaaffilerneqarnera pillugu isornartorsiuisimasutut issuarneqarluni.

Allaaserisami ilaatigut allassimavoq Anthon Frederiksen isumaqartoq avatangiisinut isumaqatigiissut decembarip 18-ani 2012-mi atsiorneqartoq siunniussaannarnik kusanartunik imaqartoq inatsisitigullu pituttuinani.

Ingeniørenimi allaaserisaq tamaat uani atuarsinnaavat

Powered by Labrador CMS