Iserit: Taamaattumik qaammat ilivitsoq kissartoqanngillat

Sermitsiaq.AG'mi allaaseraarput Ruudu Olsen Tasiilami Iseritip inissiaataani attartuusoq. Taassuma inaani decembarip aappaanili imermik kissartumik pilersuineq unitsinneqarpoq, soorlu Sara Helmsip Aqqutaani inissiani 50-ini allani taamaattoqartoq.

Michael Waaentz, Tasiilami Iseritsip nakkutilliisuata ajornartorsiut ilumoornerarpaa nassuiaatigalugulu imermik kissartumik siaruarterussutip aserorsimanera pissutigalugu inissiat 50-it qaammat sinnerlugu imermik kissartumik pilersorneqanngitsut.

- Juullimut sapaatip akunninngoraa paasivarput kissartumik siaruarterussut aserorsimasoq. Immikkoortortaq taanna immikkuullarilluinnartoq ilisivinniittuutiginngilarput. Paarlatsissaa inniminneqqaartariaqarpoq taannalu ima immikkullaritsigaaq immikkut sananeqaqqaartariaqarluni. Taassuma pissarsiarinissaata tungaanut sapaatip akunneri tallimat ingerlassapput, Michael nassuiaavoq.

Michael Waaentz nassuiaavoq, paarlatsissaq juulli sioqqullugu inniminnerneqartoq taamaattumillu qaammatip naanginnerani ajornartorsiutip qaangerneqarnissaa naatsorsuutigigitsik.

- Naatsorsuutigaarput ajornartorsiut sapaatip akunneri pingasut ingerlaneranni iluarsineqassasoq, taanna oqarpoq.

Nillerpallaanngilaq
Nakkutilliisoq naapertorlugu imeq nillarivinngilaq 20-25 gradit akornanni kissassuseqarluni.

- Nillivinngilaq kisianni uffarfigissallugu iluarpallaarsinnaanngilaq.

- Kisianni amerlasuut imermik ataatsikkut atuisillugit imeq nillertittarpoq innuttaasullu kiassaateqarfimmut ungasinnerullutik najugallit erngup nillernerunera malugissavaat kiassaateqarfimmut qaninnermik najugaqartunit, Michael Waaentz oqarpoq.

Iserit Kommuneqarfik Sermersuup inissiaatileqatigiiffiutigaa.