Amerlaqisut qaammat ilivitsoq uffarsinnaanngillat
Tasiilami inissiat 50-it missaanniittut decembarip aappaa aallarnerfigalugu imermik kissartumik peqanngillat. - Sapaatit akunneri tallimat qaangiuppata suliarissavarput, pingasunngornermi innuttaasut tusarlerneqarput
Tasiilami Sara Helmsip aqqutaani inissiaqarfiit arfinillit Kommuneqarfik Sermersuumi inissiaatileqatigiiffimmit Iserit A/S-imit ingerlanneqartut decembarip aappaanili imermik kissartumik kuutitsiffigineqarsinnaanngillat.
Taama oqaluttuarpoq ineqartut ilaat Ruutu Olsen Sermitsiaq.AG'mut.
- Maannakkut qaammat ilivitsoq sinnerlugu imermik kissartumik kuutitsisinnaanngilagut, Ruudu oqarpoq nangilluni inissiat 50-it missaat eqqartorlugit.
- Imermik kissartumik kuutitsisinnaajunnaarnerput sapaatip akunneranik ataatsimik qaangiummat saaffiginnippunga. Decembarip qeqqani inissiaatileqatigiiffimmit misissuiartortut takkupput aatsaalli ullut arlallit qanngiummata suna akornutaanersoq paasillugu, Ruutu Olsen oqaluttuarpoq.
Iserit: Sapaatit akunneri tallimat qaangiuppata iluarsaatissavarput
Inissiaatileqatigiiffimmit ilisimatinneqarpugut, inissiaatileqatigiiffik taartissanik inniminneeqqaartariaqartoq ajoqutip iluarsineqarnissaata anguniarlugu, taamaattumik inissiaqarfinni arfinilinni najugallit juullimi ukiortaamilu kissartumik uffarsinnaanngillat.
Ruutu Olsen naapertorlugu Iserimmit neriorsuutigineqaraluarpoq pissutsit juullip ukiortaallu akornanni iluarsissasut, ineqartulli Iserimmit tusarlerneqanngillat - aamma iluarsaassisoqanngilaq.
- Ippassaq pingasunngornermi Iserit sianerfigaara paasiniarlugu qaqugu iluarsaasiartortoqassanersoq. Uannut oqarpoq sapaatip akunneri tallimat suli utaqqeqqaartariaqartut iluarsineqarnissaata tungaanut, Ruudu Olsen qaammat ataaseq sinnerlugu kissartumik uffarsinnaasimanngitsoq oqaluttuarpoq.
Iserimmit oqaatigineqartut ilumoornerarneqarput
Michael Waaentz, Iserit, Tasiilami nakkutilliisuusoq Sermitsiaq.AG'mut ajornartorsiut ilumoornerarpaa. Aaqqissuisoqarfimmit taassuma nassuiaataa saqqummiutissallug piareersarpugut.