Kalaallit atortittartut atugarliornerpaapput
Kalaallit atortittartut Aarhusimi atortittartunit allanit atugarliornerupput, ornittakkami pisortaq oqarpoq
Ullumi siusinnerusukkut Aarhusimi atortittartut inooriaasiat ukiuni qaangiuttuni allanngorsimasoq tusarparput.
Qallunaat arnartaat aqqusinerni atortinniarsaralutik angalaarunnaarnikuupput, aningaasarsiffissatik SMS aamma e-mailit aqqutigalugit isumaqatigiissuteqarfigisaleraat kalaallit arnartaat allatut atorteriaaseqarput, atornerluinermut aningaasanik pissarsiniarnermut tunnganngitsoq unnuiffissarsinissamulli tunnganerusoq.
Aarhusimi ornittakkap Redenip - atornerluisunit atortittartunillu atugaasup - pisortaa naapertorlugu kalaallit arnat aqqaneq-marlunniit 15-inut amerlassusillit 30-niit 50 missaannut ukiullit, atortittartutut inuupput.
- Arnat akilersittarnersut aperineq ajorpavut, kisianni inooriaasiat naapertorlugu taamatut atugaqaratarsinnaapput. Arnat ilaasa oqaluttuarineq ajorpaat allat namminneq oqaluttuartarput, Joan Hougaard Sermitsiaq.AG.'mut oqaluttuarpoq.
- Kalaallit arnartaat atortittartut allat akornanni atugarliornerupput, pissutigalugu arnanit allanit allaanerusumik atorteriaaseqaramik, Joan Hougaard nassuiaavoq.
Timertik akiliutigisarpaat
Atortittariaaseq allaanerusoq tassaavoq kalaallit arnartaat nalinginnaasumik aningaasanik akilerneqarneq ajormata.
- Amerlanertigut angutit imerniartarfinni naapittarpaat angerlaqatigalugit tamaani unnuinissartik, imigassartugassatik immaqalu hashitugassartik atoqatigineqarnermikkut akilertarpaat, Joan Hougaard nassuiaavoq nangillunilu, kalaallit arnat amerlanertigut imigassamik hashimillu atornerluisuusartut.
- Kisianni ataasiakkaat ikiaroorniutinik sakkortuunik ajornartorsiuteqarput.