Aleqa: Kuupiup ukiortaami oqalugiaataa pikkunaak
Siumut partiata siulittaasua Naalakkersuisut siulittaasuata Kuupik Kleistip ukiortaami oqalugiaataa pakatsissutigaa, Aleqa Hammondip oqalugiaat nalinginnaasutut pikkunaatsutullu nalilerpaa
Aleqa Hammondip Nalaakkersuisut siulittaasuata Kuupik Kleist, IA qinersivimmi matumani siulittaasutut oqalugiaataa pissanngatigisimavaa.
Tunngaviatigulli isumaqarluni oqalugiaat pikkunaatsoq 2012-imilu ukiortaami oqalugiaatip nanginneriinnaraa.
- Kuupiup oqalugiaataa nalinginnaavoq tupaallaatissartaqarani. Naatsorsuutigisimagaluarpara imartunerussasoq ilami qinersivimmi uani nunap pisortaatut naggammik oqalugiarpoq. Kisianni oqaasissani aalajangersorsimavai taamaassasut tamannalu ataqqivara, nalagaaffiulli pisortaata oqaaseqaatai maqaasivakka, Aleqa Hammond oqarpoq nangillunilu eqqaamasariaqaripput Kuupik Kleist kisiartaalluni oqalugianngimmat, kisiannili nunap pisortaa inuiannut oqalugiarmat, oqalugiaataatalu nunami innuttaasut 2013-imi pitsaanerusumik atugaqarnissamut ataatsimoorfiusussaagaluartoq qiimmattarnermik, ataatsimuussutsimik neriummillu imaqarluni.
Kuupik Kleist nersualaaraa
Taamaattoq ukiortaami oqalugiaatip ilaa isumaqataaffigaa.
- Innuttaasunut inuusunnernut aamma utoqqaanernut oqaatsigisai taakkua paaqqutarinerunissaannut oqaatsit isumaqatigaakka. Aamma isumaqatigaara imminut napatinnissaq eqqarsaatigalugu nunatsinnut aningaasanik isaatitsinissap pisariaqarnera, Aleqa Hammond oqarpoq taassuma aamma maluginiarpaa nunatsinni naalakkersuisut siulittaasuata oqalugiaanni qiteqqukkamiuk aatsaat nunatsinni inuussutissarsiutit pingaarnersaat eqqaagaa.
- Tamatu ersersippaa Kuupik naalakkersuisuunermini aalisarneq qanoq nalilerneraa. Aalisartut aamma piniartut oqalugiaammi eqqaaneqanngillat, uanga isumaqartunga taakkua sulinerat angisooq nunatta aningaasaqarnerata napassutaa qujaniutigissallugu pissusissamisooraluartoq, Aleqa Hammond oqarpoq nangillunilu:
- Kuupiup nunatsinni inuussutissarsiutit pingaarnerpaartaat oqalugiaatimi qeqqata missaani aatsaat taavaa, naak taakkua nunatsinni aningaasanik isaatitsisuugaluartut. Aalisarneq pillugu isumaqatigiissutit aamma aalisartut piniartullu akerliussutsimillu takutitsisarnerat kiisalu isornartorsiuinerujussuit pisimasut oqaatsimik ataatsimik eqqaanngilaa. Naalakkersuisut siulittaasuatut tulluussimaarnini takutittariaqaraluarpaa oqaatigalugulu isornartorsiuisartuminik tusarnaartuulluni. Uani ukiup ingerlanerani akerliussutsimik takutitsisarniigaluit eqqaanngilai kiisalu akerliussutsimik takutitsisartut tusaaniarsimanerlugit, Aleqa Hammond Sermitsiaq.AG'mut oqarpoq.
Politikerit isiginiarneqarpallaarput
Tamatuma saniatigut Aleqa Hammond isumaqarpoq, Kuupik Kleistip piffissarujussuaq atorlugu politikerit oqalliseriaaserlu eqqartorpai:
- Qinikkat qanoq nipeqarnerat innuttaasunit isiginiarneruaa. Pisortatut isornartorsiorneqarsinnaasariaqarpoq, uanili allaanngilaq imminut illersornissani kisiat ulapputigigaa. Isumaqanngilanga ukiortaami oqalugiaammi taamak initutigisariaqartut. Ukiortaami oqalugiarnermi innuttaasut saaffigineqartussaapput aqutsisoqarnermik misigissutsimik pilersitsisumik, nersualaarneqarnissamut isornartorsiorneqarnissamullu inissaqartitsisumik, aamma naalagaaffimmik aqutsisutut tamakku ilanngunneqartariaqarput.
- Ataqatigiinnermik ataatsimoorussaqarnermillu misigissutsimik pilersitsisussaavoq, isumaqanngilanga taamaaliortoq, Siumut partiiata siulittaasua oqarpoq naggasiutigalugu oqarluni Kuupik Kleist ukiortaami pilluaqqullugu, naatsorsuutigisariaqaraalu partii illuatungiliuttoq Siumut siunissami suleqatigiinnermik pitsaasumik ingerlatsiinnassamaartoq.