D: Akisussaaffeqarneq qunguginngilarput
Partiip siulittaasua Jens B. Frederiksen ukiortaami oqalugiaamini suliniutinut angisuunut inatsit pingaarteqaa aama Demokraatit qunguginngilaat aalajangiussassanik pisariaqartunik tujorminarsinnaasunillu aalajangiinissartik
Sutigut tamatigut akisussaassuseqarneq Demokraatit siulittaasuata ukiortaami oqaaseqaammini eqqartorpaa:
Oqaaseqaatini qulequtsersimavaa; Akisussaaffik tigusiuk ! Uangut taamaaliorpugut!
- Demokraatini aalajangeeqataaffigut pillugit isornartorsiorneqarnissatsinnut piareersimavugut. Akisussaaffigerusuppagut aalajangeeqataaffigisimasagut. Takorloorsinnaanngilarput aalajangeeqataannginnissarput. Ataqqinninnerussanngilaq akisussaaqataanerunanilu inunnut sinniisoriumalluta qinersisimasunut. Isummertarnissarput pillugu qiningaavugut. Aalajangeereeraangattalu aalajangiusimasartussaavagut, Jens B. Frederiksen allappoq.
- Aalajangernerput illersussavarput kinaluunniit saassussigaluarpat. Illersussavarput perruualaarluta aalajangersimallutalu, qamani nalunnginnatsigu aalajangernerput nunatsinnut pitsaanerpaasoq. Taamaassimanngippammi allamik aalajangiisimassagaluarpugut.
Suliniutinut angisuunut inatsit nuannaarutigaa
- Taamaattumik erseqqissarlara Demokraatini ingerlatat annertuut pillugit inatsit iluarsimaaqigatsigu. Isumaqarpugut ukiorpassuit ingerlaneranni aalajangikkani pingaarnerpaasoq. Ingerlat annertuut pillugit inatsit sinaakkutissatut inatsisaavoq, aatsitassarsiorfinni assigisaannilu malittarisassat pingaarnerit allattorneqarput, pineqartullu ima annertutigaat Kalaallit Nunaanni uangut kisitta artorlutigit piviusunngortinnissaat – aningaasat najugaqariaaserpullu pissutaallutik, Demokraatit siulittaasuat allappoq.
Ilaatigut pissutaaqataavoq ukiut kingulliit ingerlaneranni raajanut TAC-p ukiumut 125.000 tonsiniit 2013-mi 90.000 tonsinut appartussanngornera. Aamma qularnarpoq siunissami pisassiissutit amerlineqarsinnaanissaat. Taamaattumik immikkut pingaaruteqarpoq aatsitassarsiornerup aallartinnissaa tamanna aqqutigalugu landskarsi aningaasanik isaatitsisinnaaqqullugu.
Siumut qinnuigaa
Jens B. Frederiksenip ukiortaami oqaaseqaammini Inatsiartuni ilaasortat allat assigalugit Siumut 2013-imi akissussaassuseqaqqullugu suleqataaleqqullugulu kaammattorpaa, tamanna demokratiinut tulluartuussammat.
- Nunarput asasarput aningaasarsiornikkut isumannaatsumik ingerlatsisinnaasunit siulersorneqartariaqarpoq, inuutissarsiornikkut siuarsaarusuttunit suliffissanillu nutaanik ataavartunik pilersitserusuttunit, siunissami tungiuineq pitsaasoq qularnaarumallugu, Demokraatit siulittaasuat allappoq erseqqissaatigalugu Demokraatit kingumut akisussaaffimmik tigusinissaminnut piareersimasut.
Læs hele formand for Demokraternes Jens B. Frederiksens nytårsudtalelse på dansk og grønlandsk i de vedhæftede filer herunder