Aleqa: Siumut suleqatiserinnippoq

- Inuiattut ukiumi nutaami ataatsimoortumik anguniagassinneq pingaaruteqarpoq. Angujuminaatsuusinnaasut, artornarsinnaasut siunniuteqarfigigaanni qasujaassuseqarnikkut, sapiissuseqarnikkut uteriissuseqarnikkullu anguneqarsinnaasut isumaqarpunga.

- Siumut isumaqarpoq inuiaqatigiittut imminut piumaffigineq, anguniagassinneq aammalu siunnerfeqarneq ataatsimoorussaasoq pinngitsoorneqarsinnaanngitsoq, iniattut pisuunnguutigiinnarnagu inuiattut alloriaqatigiinnermi nukittuunngornissaq pisariaqartikkatsigu.

Taama Siumup siulittaasua Aleqa Hammond ukiortaami oqaaseqaatimini erseqqissaassuteqarpoq.

- Pisuussutivut uumaatsut pigisavut tassaapput imminut napatilernissamut aqqutissat pingaaruteqarluinnartut qitiusut ilaat. Pisuussutitsinnit annissorneqartussanit inuiaat kalaallit uagut piginnittuusugut pissarsiassatsinnit salliutinneqarnissarput Siumut ukiumi nutaami qulakkeerinnissaminut siunnerfeqarpoq. Siunnerfik tamanna innuttaasunit peqataaffigineqarumappat angusassaq angisooq inuiattut angusinnaalluaripput qularutiginngilarput.

Anguniakkamik siunnerfeqarneq

- Anguniagassaavoq imaaliallaannarluni anguneqarsinnaanngitsutut isikkulik, ataatsimulli inuiaqatigiit anguniarlugu siunnerfigigutsigu anguneqarsinnaasoq Siumut isumaqarpoq, taamaammat ukiumi nutaami anguniagaqarnermut Siumut peqatiserinnippoq inuiaqatigiinnullu kalaallinut saaffiginnilluni ataatsimut anguniakkatsinnut peqatiserinnilluni, Aleqa Hammond allappoq, taamaattorli ukiortaami oqaaseqaatimini suut aalajangersimasumik anguniarneqarnissaat suleqatigiissutigineqarnissaallu iserfiginagit.

Siumup siulittaasuata ukiortaaq isumalluarfigaa, Inatsisartunut, kommuninut, nunaqarfinni aqutsisunut ilagiillu sinniisaannut qinersisoqartussaammat.

Siumup siulittaasuata Aleqa Hammondip ukiortaami oqaaseqaataa qallunaatut kalaallisullu tamakkerlugu matuma ataani atuaruk