Ukioq manna mitaarluni unamminissaq qallivoq
Sapaammi kunngit pingasut ulluanni ileqqoq naapertorlugu mitaallaqqinneqqisaalluni Sisimiuni Taseralimmi unammisoqassaaq
2013-i aallartiinnaqaaq, ukioq mannalu pisarnertut kulturikkut illorsuarmi Taseralimmi kulturikkut aaqqissuussat siullersaat tassaassaaq: Mitaartunik unammisitsineq! Tamanna pissaaq Kunngit Pingasut ulluanni, 6. januar nal. 19.00.
- Mitaarlutik unammeqataaniartut nal. akunn. affaq sioqqullugu aggereeqquneqarput, pisarnerlu malillugu normumik tunineqassapput. Soorunami mitaartup kinaanini isertuuttarmagu aqqa saqqummiunneqassanngilaq, Arnajaraq Støvlbæk, Taseralimmi pisortaq oqarpoq.
Naliliissapput Sisimiuni kalattoortartunit Klaus Filemonsen, Erinarsoqatigiit Noqartermit Kirstine Knudsen kiisalu Kommunaldirektøri Paneeraq Olsen. Ilisarititsisassaaq, nuannersuaannartoq Otto-Mika Villumsen.
Isiginnaarneq peqataanerlu akeqanngilaq. Peqataarusuttut isiginnaarusuttullu tamarmik tikilluaqqusaapput, Arnajaraq Støvlbæk erseqqissaavoq aamma oqaluttuarpoq mitaallaqqinneqqisaannerup kingorna mitaartut illoqarfimmi ersisaarinertik nangissinnaagaat.