Aana Qanoruumi aaqqissuisoq nutaaq
Sermitsiaq.AG'mit saqqummiunneqarpoq KNR'ip TV'mi nutaarsiassaqartitsiviup Qanorup kina aaqqissuisortaarissaneraa
Qanorooq nutaamik aaqqissuisortassaa, tassaavoq 48-nik ukiulik Walter Turnowsky, taanna tv-imi aaqqissuisutut Sjællandske Mediers 24 Sjællandske atorfimmit aggerfeqarpoq. Turnowskyp Facebookikkut atofimmi nukinnissaa eqqartorlugu oqarpoq Sjællandi qimallugu Inuit Nunaannut ingerlaassalluni.
Sjællandske Medianit sulisunut nalunaarutigineqarpoq Walter Turnowskyp 24 Sjællandske 1. marts 2013 qimassallugit kissaatigisimavaa, pissutigalugu Kalaallit Nunaata tv-avisiani aaqqissuisunngussagami.
Qanoruumi pisortanngortussaq Sønderjyllandimi Aabenraamit aggerfeqarpoq, Deutsches Gymnasium für Nordschleswig ilinniarnertuunngorluni. TV'mi tusagassiortutut Tysklandimi Dresdenimi Fortbildungsanstalt der Wirtschaft ilinniarluni.
Tamatuma saniatigut Københavnip universitetianit biologimi cand. scientiuvoq. Tusagassiortutut sulinermini Radio Mojn Aabenraami, TV Danmark aamma Nordjyske Medier suliffigai. Tamatuma saniatigut Bündnis 90/Die Grünen, Tysklandimi partiip De Grønne oqaaseqartartorinikuuaa.
Tamatuma saniatigut Walter Turnowsky maratonimik arpattarpoq ilaatigut arpannerit Københavnimi aamma Berlinimi peqataaffigisimallugit.
KNR'imi tusagassiinermut pisortaq, Mikkel Bjarnø Lund, KNR'imut oqaatigaa Walter Turnowsky marsip aallaqqaataani Qanoruumi aaqqissuisutut atorfinitsinneqartoq. Turnowsky aaqqissuisooqatigiit ilagilissavai taakkua tassaapput Arnaq Nielsen aamma Bikki P. Kleist.