KNAPK: Aalisartut piniartullu tusaaniarnerullugit

KNAPK-p siulittaasuata ukiortaami oqaaseqaammini aalisartut piniartullu pisortanit tusaaniarneqarnerunissaat illersorneqarnerunissaallu oqariartuutigaa.

Ukiortaami oqalugiarnermini KNAPK siulittaasua Leif Fontaine politikerit aalajangiisartut isornartorsiorpai aalisartunik piniartunillu tusaaniannginnerarpallaarnerarlugit. Assi: Søren Duran Duus

Aallarniutigalugu KNAPK sinnerlugu naalakkersuisunut partiinullu kajumissaarutigaa aalisartuunerup piniartuunerullu siuarsartuarneqarnissaa naalakkersuinikkut suliniutigeqqullugu, nunatsinni inuussutissarsiornikkut misissuinerit nalilersuisarnerillu ersersimmassuk, immap pisuussutaanik inuussutissarsiuteqarneq tassaasoq inuiaqatigiit kalaallit inuuniarnermi avammullu tunisassiuinermi toqqammaviat.

- Aalisartutut piniartutullu inuussutissarsiuteqarnerup sineriammi nunallu immikkoortuini inuit najugaqartuarnissaat qulakkeeqqajuartussaava, aamma siunissami. Taamaattumik aalisarnerup piniarnerullu aqunneqarnera isumannaatsoq pitsaasorlu aamma tassaassaaq sineriammi nunallu immikkoortuini inunnik isumaginninneq isumannaatsoq pitsaasorlu. Tamannalu pissappat atuisut qanimut oqartussaaqataanerat tunngaviusariaqarpoq, KNAPK-p siulittaasua Leif Fontaine oqaaaseqaammini ilaatigut allappoq.

Nangilluni allappoq aalisartut piniartullu maannamut tusaaniarneqanngippallaarujussuarnerat atuisutullu oqartussaaqataanerat pisortanit suusupagineqaleraluttuinnarnerarlugu.

- Pingaartumillu Nunattta imartaani aalisakkat, piniakkallu takussaalerattuinnarfiisa aammalu pinngortitap allanngoriartuinnartup nalaanni, uumassusilinnut aqutsinermi aalisartut piniartullu ilisimasaasa maannamut annertunerusumik Nunatsinni Naalakkersuisuniit partiiniillu naliliiffigineqarluni pissusissamisut atuutsinneqarnissaa iluarsiivigineqartariaqalerpoq, Leif Fontaine allappoq, eqqaamaniartariaqarnerarlugulu inuiaat Inuit atugartuussutsikkut kultoorikkullu imaani aalisakkanik piniakkanillu inuussuteqarneq kinaassuseralugulu ilisarnaatigigaat. Naggasiutigaa naalakkersuisut inuuniarnermi isumalluutit pillugit aalajangersaannginnerminni inuppalaarssusermik takutitsisarnissaat minnerunngitsumillu atuisut oqartussaaqataatinneqarnissaat KNAPK-miit piumasaralugu.

Leif Fontainep ukiortaami oqaaseqaataa tamaat uani atuaruk:

Powered by Labrador CMS