Qatserisartut biskorpip inaa ornikkaluarpaat
Nuummi Qatserisartut ukiutoqqami ataasiarlutik qalerrinneqarput. Biskorpip illutoqaanit kalerrisaarisoqarmat
Annonse
Ukiutoqqami arfineq-pingasut qaangilaaraa innuttaasut ernumasut politiinut sianerlutik oqaluttuaraat qummoroortartup sinnera suli ikumasoq Nuummi oqaluffitoqqap eqqaani biskorpip inaata pujoorfianut pulasoq takusimallugu.
Qatserisartut aggersarneqaramik paasivaat pujoorfiup iluani inniliortoqalersimanngitsoq.
Nuummi Qatserisartut taanna orniguffituaraat naak Nuummi politiit ulapikkaluaqisut. Inuit nuannattorpassuit ukiutoqarsiortut akornanni qulingiluat eqqissisimasinnaanngitsut politiit isertitsivianni unnuisinneqartariaqarsimapput.
Illoqarfimmi taxanik ingerlatsitsisut nalunaarput ukiutoqqami ulapissimaqalutik. Unnua qeqqata kingorna taxarniat amerlangaarmata malinnaasinnaajunnaarput amerlaqisullu angerlamut pisuinnartariaqarsimallutik.