Kalaallit Nunaat pillugu Dronning oqarpoq
Dronning Margrethep 41-ssaannik ukiortaami oqalugiarnermini Issittumi Sakkutooqarfik eqqaavaa aamma Kalaallit Nunaanni inuiaqatigiit ineriartornissaannut aalajangiussat pingaarutillit aalajangiiffigineqartussanngornerat
- Ukiutoqqap unnukkua. Nalunaaqqutap akunneri arlaqanngitsunnguit qaangiuppata rådhusip siarngi ukiumut nutaamut iserneq nalunaarutigissavaat. Tamanna taamaattussaavoq aamma neriuuteqarluta kissaateqarlutalu ukioq nutaaq iserfigissavarput; qanoq issanersoq siumut ilisimasinnaanngilarput uagutsinnut tunngappat imaluunniit Danmarkimi inuiaqatigiinnut tunngappat.
Taama pisarnermisut dronning Margrethep toqqaannartumik ukiortaami oqalugiarnini aallartippaa, taanna nal. 18 Danmarkimi aallakaatinneqarpoq.
Sermitsiaq.AG'mit Ataqqinartorsuup Dronningip ukiortaami 2013 Kalaallit Nunaat aamma Savalimmiut pillugit oqalugiaataa tigulaariffigaa:
'Ukiarmi nuannaarutigeqisannik Kalaallit Nunaannut sivikitsumik tikeraatsiarpunga, Savalimmiut Sakkutooqarfiat aamma Kalaallit Nunaata Sakkutooqarfiat imminnut katitinneqarlutik Issittumi Sakkutooqarfinngortinneqarmata Nuummi angerlarsimaffeqartumik. Sakkutooqarfiup nutaap ersersippaa nutaanik unammilligassaqarnera aamma nutaanik periarfissaqarnera, issittumi ineriartornerup nassataanik.
Kalaallit Nunaanni inuiaqatigiit ineriartornerannut aalajangiisuusussanik pingaarutilinnik aalajangersaasoqassaaq. Tamatta tamanna Avannaaniikkutta Kujataaniikkuttaluunniit maluginiassavarput.
Naak sømilinik tusindilinnik Danmark, Kalaallit Nunaat aamma Savalimmiut imminnut ungasissuseqaraluartut naalagaaffeqatigiinnikkut oqaluttuarisaanitsigullu immitsinnut attaveqatigiippugut. Uanga ilaqquttamalu Kalaallit Nunaannut Savalimmiunullumi attaveqarneq qanimut misigiuarsimavarput. Oqaatsit taakku atorlugit kikkulluunniit Kalaallit Nunaanniittut aamma Savalimmiuni tamat ukiortaamik qamannga pisumik pilluaqquagut aamma inuulluaqqusutivut nassiuppavut.