Juulliliat akersuulluarput
Assammik arsarluni Brugsenip juullimi unammiuaartitsinerani GSS marloriarluni ajugaavoq
Juullikkunni ullut nuannisarsiusut nerilluarfiusullu qaangiutilerput. Orsoq timimit peertariaqarpoq tamannalu ilaatigut pisinnaavoq ulluni makkunani Nuummi assammik arsarnermi.
Decembarip qiteqqunnerani unammiuaarnerni unamminerit siulliit ingerlanneqarput. Arnani angutinilu GSS-p NÛK ajugaaffigaa. Sisamanngormat unnukkut GSS Danmarkimi ilinniartunut juullisioriartortunut unammivoq. Taakku taaguuteqarput QNA.
GSS’p arnataa QNA-mut unammigamik 39-23-mik ajugaapput nikinnermi 16-8-mik inissisimallutik. GSS-imi isertitsitsisuupput Najaaja Anja Lyberth 9, Panu P. Grønvold 8. QNA-mit isertitsipput Aili Pedersen 10, Britt Nielsen 4..
Angutini GSS aamma QNA-mut ajugaavoq, 31-23-mik nikinnermi 15-12-ulluni. GSS-imi isertitsisuupput Miki A. Heilmann, Danny Brandt aamma Nuka B. Heilmann tamarmik 5. QNA-mi isertitsipput Chresten Rossen Bjørn aamma Junior Frederiksen tamarmik 4.
Ullumikkut arfininngornermi ajugaaniutivinnerit ingerlanneqassapput Inussivimmi. Arnat pingasunut angutillu 16.30.