Oqaluttuaannanngorpoq

Arfininngornermi decembarip 29-ani Air Greenlandip qulimiuguuliutaa S 61 nalinginnaasumik angallassinermini naggataaruni oqaluttuaannanngussaaq.

Taamanikkut Grønlandfly nunarsuarmi timmisartuutileqatigiinnit siullersaalluni isorartuumi angalasunik angallassisalerpoq. Taamaaliornissaminut timmisartuutileqatigiit uparnaakkut 1965-imi qulimiguullit Sikorsky S-61-t pingasut pisiarai.
Ullumikkullu taakkunannga kingullerpaaq OY-HAG 1965-imi sananeqartoq naggataamik angallassissaaq. Taamaalilluni 'arnaavoq utoqqasaaq' 47-nik ukiulik.

Ullumikkut nalinginnaasumik angallassineq Narsarsuarmiit Narsamut Qaqortoq aqqusaarlugu Nanortalimmut ingerlassaaq. Ualiluarneranilu Narsarsuarmiit Narsaq aqqusaarlugu Qaqortuliassaaq.