Anorersuup juullisiorneq kipigaa
Naalagiarneq anorersuarpallaarnera pissutigalugu taamaatinneqarpoq. Oqaluffiup erfalasulerfia napivaa, illuaraq tingisillugu Tasiusamilu naalagiarusukkaluit angerlarsimatiinnarlugit
Juullip ullorsuani Tasiusami naalagiaqatigiinnissaq pilersaarutaasoq taamaatiinnarneqarpoq, Upernaviup avannaani nunaqarfinnguami anorersuarpallaarnera pillugu inuppassuit anisinnaanngillat - juullimi naalagiarusukkaluit uggoreqisaannik.
Anori ima sakkortutigaaq nunaqarfiup ajoqiata Thomas Svendsenip naalagiartitsinissani taamaatiinnarlugu, inuit oqaluffiup tungaanut ingerlanerminni ulorianartorsiorsinnaanerat pillugu.
Taamaattumik nammineq kisimiilluni oqaluffik alakkartissallugu aalajangerpoq - uggoreqisaminik paasillugu oqaluffiup erfalasulerfiisa aappaat napisimasoq iliveqarfiup eqqaaniittoq oqaluffiullu illuaraa tingissimasoq.
- Soorunami ullumikkut naalagiarnissatsinnut qilanaarsimagaluarpugut, kisianni nunaqarfimmi katersuuffigisartagaq nuannersoq ullumikkut ataatsimooqatigiilluta najorsinnaanngilarput, Thomas Svendsen.
Ullup ingerlanerani kingusinnerusukkut naalagiartitsinissanik pilersaarutigaa.