Nanoq aqerlunik silallu pissusaanik unammilligassaqarpoq

Suna nannumut ajornerpaava, silaannaap allanngoriartornera piniagaanerluunniit? Suliniaqatigiit isumaqatigiinngillat

Canadami nanoq navianartorsiortinneqarpoq, silaannaap allanngoriartorneranik imaluunniit amiata piumaneqarnerujussuanik. Foto: Peter Bondo Christensen

Suliniaqatigiiffiit ilaat isumaqarput silaannaap allanngoriartornera nannunut ajornartorsiutaanerusoq.
Allat isumaqarput nannup amianik atortuinillu allanik nioqquteqartarneq nannunik nungutsigaluttualersoq.

Sorleq pileqqaarpa? Kukkukooq - imaluunniit mannik?

Taamaattorli isumaqatigiissutigineqarpoq ukiuni kingullerni tallimani silaannaap allanngoriartornertigut nannullu piniagaanerulerneratigut nanoq nungutaagaluttualersoq. Taama allappoq BBC.

Tamanna Naalagaaffiit Peqatigiit uumasut nujuartat pillugit ataatsimeersuartitsinerani oqaluuserisamiippoq, ataatsimeersuarneq uumasunik nungutaagaluttuartunik nioqquteqarneq pillugu marsimi 2013-imi Thailandimi ingerlanneqassaaq. Tamannalu pivoq TUluit Nunaanni WWT-imi, Verdensnaturfondimi, kisitsisit tunngavigalugit, taakkuli oqarpoq Canadami nannut amiinik tunisaqarnerulersimaneq ernumanartoqartoq amillu ataatsip akia qaffasissupilussuusoq. WWF-imit kisitsisit takutippaat nannup amia ukiuni tallimani kingullenri 375 procentimik qaffariarsimasoq, taamaalilluni maannakkut nannup amia ataaseq 60 - 70.000 koruunit missaanniilluni.

Ukiut tamaasa Canadami nannut 600-t pisarineqartarput ukiunilu kingullerni qulini ammit, pinnersaasiat tammajuitsut kukiillu 30.000 missaanniittut tunineqarsimallutik.

Tuniniaasarnermut akerliusut nunani tamalaani nannunik tuniniaaneq inerteqqutaalersikkusuppaat. Aatsaat siullermeertumik nannunik piniarneq tuniniaanerlu ataatsimiinnerni oqaluuserineqalinngilaq. 2010-mi tamanna itigartitsissutigineqarpoq.

Aaqqiagiinngissutaasoq tassaavoq isumaqatigiissutigineqarsinnaangnimmat sooq nannut illersorneqassanersut. Silaannaap allanngoriartornera peqqutigalugu imaluunniit nannup amianik piumanerujussuarmut illersorniarlugit?

Canadami nunap inoqqaavisa inerteqqutaalernissamik siunnersuut akiorniarlugu sulissutigaat. Ingammillu mamiasuutigineqarpoq USA allannguiniarnermi siuttuummat.

- USA-mi naalakkersuisut silaannaap allanngoriartornera sakkugalugu nunat tamat akornanni nannut amiinik tuniniaaneq inerteqqutaalersinniarpaat, silalli allanngoriartornera iliuuseqarfiginianngivillugu, Nunavut Tunngavimmi James Eetoolook oqartoq BBC allappoq.

2008-mi nunatsinni naalakkersuisut nannumik tunisassiat nunatsinneersut anninneqarnissaat inerteqqutaatilerpaat, nanoqassutsimut piniagaanerannullu tunngatillugu nungusaataanngitsumik piniartoqartartoq qulakkeerneqarsinnaanngimmat. (Aallerfik natur.gl)

Powered by Labrador CMS