- Oqaatsikka qunusaarutaanngillat, Jens B.

- Oqaatsikka qunusaarutaanngitsut, soorlu Jens B. Frederiksenip taamak oqaatigigaluarai.

Taamak erseqqissaavoq Doris Jakobsen, Siumut sinnerlugu folketingimut ilaasortaq.

Taamatut oqarpoq ineqarnermut, attaveqarnermut angallannermullu naalakkersuisoq Jens B. Frederiksen, Demokraatit, ullualuit matuma siorna Doris Jakobsen sakkortuumik isornartorsiormassuk, taassuma naalagaaffeqatigiinnerup siunissaa qernertuinnaanerarmagu Folketingip Kalaallit Nunaanni suliniutinut angisuunut matussiniarnera pillugu oqaaseqaateqaatai, Demokraatinit illersorneqarsinnaanngimmata.

Kisianni Jens B. Frederiksen kukkuluttorpoq Doris Jakobsenip oqaasii paatsooramigit.

Oqaaseqarsimasoq nammineq taamak isumaqarpoq.

- Aningaasanut inatsimmik oqallinnermi oqarpunga, naalagaaffeqatigiinnerup siunissaa taartungavoq, Folketingip suliniutinut angisuunut inatsit matutissagaluarpagu. Qunusaarutaanngillat naak Jens B. Frederiksen taamatut oqaatiginiarai, kisiannili ilumoortumik ernumaneq. Naak Siumumit naalagaaffeqatigiinneq kissaatigineqaraluartoq, Kalaallit Nunaannit naligiimmik pineqarluni ilaasortaaffigineqartoq, suli taanna angusimanngilarput, Doris Jakobsen oqarpoq.

Imminnut saassutariittut
- Jens B. Frederiksen oqarpat, Demokraatit oqaloqatiginnermik aallaaveqarusuttut naalakkersuisooqatigiit aperisariaqarput, sooq kalaallit kattuffii suliniutinut angisuunut inatsimmi allanngortinneqartumi peqataanissaat periarfissarsiuunneqannginnersut? Sooq innuttaasunik oqaloqateqarnissarluunniit anguniarneqanngila? Soor suliniutinut angisuunut inatsit tuavisaarutaassava, qallunaanik politikkerinik ammasumik oqaloqatigiinnissamut piffissaliisimanngikkaanniluunniit? Sooq ima ulapitsigippat inatsimmik pingajussaaneerinninnissaq upernaamut utaqqinneqarsinnaanani, qallunaat oqartussaasui suliniutinut angisuunut annermik suliniuteqarnissaannut qinnuteqarsimananiluunniit? MInnerunngitsumillu: Naalakkersuisooqatigiit qanoq iliussappat, Folketingip politeeqarnerut, eqqartuussiveqarnermut sulinermik nakkutilliinernut aningaasaliissutini pisariaqartut unitsissappagit?

- Jens B. Frederiksen apererusunnarpoq taassuma naalakkersuisooqatigiillu isumaqarnersut naalagaaffeqatigiinnerup siunissaa qaamasuinnaasorineraat, Folketingip suliniutinut angisuunut inatsit mattutissagaluarpagu? Taamaattoqassappat naalakkersuisooqatigiit nammineq inatsisiliaminnik uggorinnilerpata uagut Siumumiit isummavut eqqarsaatigeqqissavavut, Doris Jakobsen oqarpoq.

Decembarip 21-anni Atassut Nuuk Demokraatituulli Doris Jakobsenip naalagaaffeqatigiinnerup siunissaa pillugu oqaaseqaataanik akuersaannginnerminnik saqqummiussipput.