Tupaallatsillugit siumut juulliararsiortinneqartut
Meeqqat angerlarsimaffiini najugallit 70-t juulli sioqqullugu Rotarymit nuannisartinneqarput poortugarsillutillu
Sisamanngornermi unnukkut Godthåb Bryghus meeqqat angerlarsimaffiini najugalinnik nuannaaqisunik ulikkaarpoq. Pisarneq naapertorlugu peqatigiiffimmit Rotary qaaqquneqarsimapput. Unnukkut nereqatigiinnermi juullimi sassaalliutit nalinginnaasut mamaqisullu nerivaat soorlu nerleq flæskesteg. Soorunami ris a la mandemik kinguleqqiutitorlutik.
Aaqqissuussinermi meeqqat angarsimaffiini najugallit, paarsisaat, Rotarymi ilaasortat taakkualu ilaqutaat peqataapput. Juullerpalaaqatigiinneranni nuannaarneq nuannisaqatigiinnerallu malunnarluni.
Nerereernerup kingorna Bamse og Kylling mamakujuttunik nassarlutik iserput. Isersimaqataapput meeqqanik erinarsoqataallutik. Orpik kaavinneqalermat tamarmik peqataajumapput. Erinarsuutit marlussuit atoreeramikkik nipertik tamaat juullip inua qaaqquaat taannalu poorsuarmik tunissutinik ulikkaartumik nassarluni iserpoq.
Meeqqat tamarmik atiisigut taasarlugit juullip inuanit poortugassarsiaanik aallertinneqartarput meeqqat tamarmik immikkut pissaannik toqqaasoqarsimavoq. Tunissutit tamarmik Rotarymit Brugsenimillu tunissutigineqarput, kusanarluinnartuullutik Nuannaarneq meeqqat isaanni takuneqarsinnaavoq. Otto Strømman illoqarfimmi niuertut tamaasa qujassuteqarfigai, Rotaryp taamannak aaqqissuussisinnaanerannut periarfissaqartitsimmata. Taassuma juullikkunni meeqqat angajoqqaatik ilaginagit juullisiortussat eqqaamaneqarnissaa pingaartinnerarpaa.