Meeqqat timigissarlutik juullip inua parsiaraat
Nuummi Eqaarsaartartut Peqatigiiffiat juullilernerani nalinginnaanngitsumik naggataarnersiorpoq
–Naamik, anaana! Nammineerusuppunga!, nukappiaraq pingasunik ukiulik oqarpallappoq.
Nuussuarmi timersortarfeeqqami eqaarsartartunut madrassip pissilluni qulaattakkap meterimik ataatsimik portussusillip qaavanut ilineqarsimasup sivingarnersaatigut majuarniarsaraaq. Tamaviaarluni paarmorpoq. Nammineerluni qaavanut qaqiniartussaavoq.
Qaava tikilerlugulu meeraq sisuulerpoq. Arnaata angumeralugu tiguaa. Tamatumuuna ikiorneqarnini ajorinngilaa, akerlilersuinanilu. Taarsiullugu qungujorujussuarpoq. Sivitsunngitsoq pallorluni sisuulerpoq.
Nukappiaqqap tunuatungaani niviarsiaqqat marluk allunaasat qilaamit nivingasut atorlugit issakatsiaarput. Teqeqqullu tungaani niviarsiaraq ataataminik arsaqateqartoq isertitsigami qiimmattarluni nillerpallappoq.
Timersortarfiup qeqqani aanaq naalungiarsuk pisuttaleqqammersoq maannalu orloqqajaalluni ingerlasoq malillugu tamaviaarpoq. Taakkua sanianniipput niviarsiaqqat marluk quassuttuumi nakkarnaveersaartarfimmi qerattaarillutik nakkarnaveersaarpasilluinnarlutillu. Eertat puussiat sunnguamilluunniit aalariarsinnaanngitsut niaquinut ilineqarsimapput.
Timersortarfimmi tunorlerpaami madrassi pullattagaq 8 meterit sinnerlugit takissusilik sapiiserfiusumik pinnguarnissamut aggersaavoq. Isuata illuaniipput meeqqat annerumaat pississaartartuninngaanneersut. Madrassikkut sukkaqalutik arpallutik aallarput ulikaqattaarniarsaralutillu.
Nuummi Eqaarsaartartut Peqatigiiffiat meeqqanut holdinut marlunnut juullilernerani naggataarnersiortitsimmat Nuussuarmi timersortarfeeqqami sukataartunnguaqarpoq.
Holdit tassaapput 0-3-nut ukiullit Melissa Hansenimit sungiusarneqartut kiisalu 3-6-inik ukiullit Alyona Køhlerimit sungiusarneqartut. Holdini taakkunani marlunni timi atorlugu pinnguarnissaq nuannisarnillu pineqarput.
Timersortarfiup iluani akunnerup ataatsip missaani arpaqattaareerlutik iloqqasunngorlutik inissipput. Aappaluttunik atisalik sillakullak juullerpalaartunik agguaavoq. Tamatuma kingorna pississaartartut piginnaanerminnik takutitsipput.