Juullimi inuulluaqqusineq
DR'ip aallakaatittagaasa pisoqaanersaat Kalaallit Nunaannut juullimut inuulluaqqusineq 1932 siullermik aallakaatinneqarpoq
Nalunaaqqutaq 17.15 nunatsinni KNR-TV'ikkut nunarsuarmi aallakaatittakkat sivisunerpaamik aallakaatinneqarsimasortaat, DRip Kalaallit Nunaannut juullimut inuulluaqqussutaa. Aallakaatittagaq ukiut tamaasa nassiunneqartoq Atlanti ikaarlugu ilaquttanut inuulluaqqussutit.
Ukiut 80-it matuma siorna aallartittoq, taamani Statsradiofoniusup (ullumi DR) 1932 siullermeerlugu Kalaallit Nunaannut juullimi inuulluaqqussutitut aallakaateqqaagaa. Kalaallit Danmarkimiittut, qallunaanut ilaqutaasut Danmarki qimallugu nuna tamakkerlugu aallakaatitamik radiukkut inuulluaqqusinerat.
Juullimi inuulluaqqussutit akeqanngitsut
Isuma sineriammi Prøvenimiit Upernaviup eqqaanit pinngorfeqarpoq, dr.dk allappoq. Tamaani aasakkut 1932-mi Andreas Lund-Drosvadip isuma nuannerluinnartoq pissarsiaraa Statsradiofonimut siunnersuutini nassiullugu allalluni; "Radioqarfik juullip unnuaani marlunniluunniit Danmarkimi Kalaallit Nunaanni ilaqutaqartut qitornaqartulluunniit akeqanngitsumik juullimi inuulluaqqussutinik nassiussisinnaasoq".
Isuma taanna Statsradiofonimit akorneqarpoq. Kalaallit Nunaanut inuulluaqqussummik nassiussisoqassappat decembarip 15-iat nallertinnagu nalunaartoqaannarumaartoq. Ima amerlatigisut takkupput, unnuit pingasut ingerlaneranni kalaallit nalunaaqqutaat naapertorlugu nal. 19 aallakaatitsisoqarsinnaammat, dr.dk allappoq.
Unnummut Kalaallit Nunaannut juullimi pilluaqqussut aallakaatinneqassaaq, 1985-imiilli TV'mut nuukkami kalaallit nalunaaqqutaat 17.15, qallunaallu nalunaaqqutaat 21.15 aallakaatinneqassaaq. Aliikkusersuissapput Aviaja Lumholt, Aavaat koret, Caroline Henderson aappariit Kimmernaq Kjeldsen aamma Mike Thomsen, aamma naatsorsuutigineqarpoq inuulluaqqussunnguanik saqqummiussisoqartassasoq.