Nunatsinnit sinniisoqarfik USAmi ammarniaraat

Kalaallit Nunaata USAmik niueqateqarsinnaanini siammasinnerulersinniarpaa. Taamaattumik namminersorlutik oqartussat amerikamiut illoqarfiisa pingaarnersaanni Washington sinniisoqarfimmik ammaalersaarput.

Berlingske allappoq.

Kalaallit Nunaata sinniisoqarfeqarnera USAp ukiorpassuarni Kalaallit Nunaanni sakkutooqarfeqarsimaneranik akuersaarnertut kalaallinit aamma ersersinneqarpoq.

Inatsisartut siulittaasuat, Josef Motzfeldt, sinniisoqarfissamik pilersaarut taavaa "Kalaallit Nunaata Danmarkimit ilaatigoortumik avissarniarnerata ilaa".

Kisianni Naalakkersuisut siulittaasuata Kuupik Kleistip, oqaatigaa kalaallit aallartitassaat Washingtonimi qallunaat aallartitaqarfiata ilaatut eqqarsaatersuutaasoq.

- Soorunalimi Kalaallit Nunaata nammineq akisusaassusaata nammineerneratalu ineriartortinnerani pinngitsoornatik ineriartortussat. Tamanna Danmark isumaqatigilluinnarlugu ingerlanneqarpoq, Kuupik Kleist Berlingskemut oqarpoq.

Kalaallit Nunaanni nunani arfineq-marluni allani sinniisoqarfiit pilersinneqarnissaat eqqarsaatigineqarpoq, taakkununnga ilaallutik Canada, Rusia, Japan immaqa Korea Kujalleq.

Kalaallit Nunaata Bruxellesimi sinniisoqarfiata avataanitigut Kalaallit Nunaat Danmarkip aallartitaqarfii aqqutigalugit nunarsuarmi sumiluunniit sinniiseqartinneqaqataavoq, taamaattumik tamakkuninnga pilersaaruteqarneq Danmarkimi uissuummissutaavoq.

Siornatigut nunanut allanutut ministeri Per Stig Møller (K) eqqaasitsivoq: Nunanut allanut politikki Danmarkimit ingerlanneqarmat:

- Kalaallit Nunaata nammineq niuernermik soqutigisani aallussinnaavaa, kisianni soorluuna Kalaallit Nunaat aamma nunanut allanut politikkimik ingerlatsilersoq.

- Inatsit tunngaviusoq naapertorlugu nunanut allantu politikki naalagaaffiup naalakkersuisuinit ingerlanneqartussaavoq, USAmut tunngatillugu nammineq politikkimik ingerlatsiniarsarissanngillat, Per Stig Møller Berlingskemut oqarpoq.