Assilisittartup tusaamasarsuup Nunarput tikikkaa
Ilisimaneqanngilaq silaannaap kissatsikkiartornera - nunarsuarmi arnat assilisittartut tusaamasaanersaasa ilaata Kalaallit Nunaannut tikeraarsimaneranut pissutaanersoq
Nunarsuarmi politikkikkut pissaanillit kisiartaanngillat Nunatsinnut kajungernerannut.
Israelimiu assilisittartoq tusaamasarsuaq Bar Refaeli Nunatsinniissimaqqooqaaq.
Issatsiaq assinik kiffartuussivimmi Instagram nittartakkamini, Kalaallit Nunaannit assini ivertissimavaa.
Nunat tamalaat tusagassiivii naapertorlugit pingasunngornermi tikeraarsimavoq, tamannali Sermitsiaq.AG'mit uppernarsineqarsinnaasimanngilaq - assimili seqerngup qaamanera aallaavigissagaani qangalaaq pisimasinnaavoq, aatsaalli qarasaasiamut ivertinneqarluni.
27-nik ukiulik Bar Refaeli nunarsuarmi assilisittartut akissarsiaqarnerpaat ilagaat, assilisittartutut tusaamaneqarnermi saniatigut tusaamasaalluni filmiliaritittartoq tusaamasarsuaq Leonardo DiCaprio aapparinikuugamiuk.
Bar Refaeli arlaleriarluni nunarsuarmi arnanit piumaneqarnerpaatut taaneqartarpoq, tassungalu atatillugu Nunatsinnit assingata nunarsuup kissatsikkiartuinnarnera Kalaallit Nunaannut pisimanera uppernarsisippaa.