Sermip aanneranit imeq kuuinnalerpoq

Nunarsuarmi sermeqarfissuit aakkiartornerat maanna arrinnerulerpoq ukiut 20-t matuma siornarnit. Tamanna nunamit sermit iigartartut annaassaannit naliliinernit takuneqarsinnaavoq; pingaartumik nunatsinni sermersuarmi aamma Sikuijuitsup sermianit.

- Misissuinerit paasinarsisippaat 1992 aallarnerfigalugu Kalaallit Nunaata aamma Sikuijuitsup erngup 11 millimeterimik qaffanneranut peqqutaaqataasut. Aappaatut pingajorarterutaa Kalaallit Nunaannit aggerfeqarpoq pingajorarterutaa ataaseq Sikuijuitsumeerluni, Marianne Sloth MadsenDanmarks Klimacenter, DKC, DMI oqaluutarpoq.

- Kalaallit Nunaanni sermersuaq piffissami 2005-2010 pisarnermit tallimariaammik sukkanermik aakkiartorpoq 1990'ikkunnut naleqqiulluni. Sermeq 263 millioner tons annaavaa, nunarsuup imarpittaanut ukiumut 0,7 millimeterinik qaffatsitsilluni.

Marianne Sloth Madsen oqarpoq misissuinermi ilisimatusartut ingerlatsisut aakkiartornermik kisitsinerminni periutsit assigiinngitsut naapertuuttulli atorneqarsimasut.

- Taamaaliornikkut siornatigornit assigiiaarnerusumik inernilinnik erseqqinnerusumillu paasisaqarpugut, taanna oqarpoq.

Nunanit tamalaanit suleqatigiit satellitsit assigiinngitsut alapernaarsutigisimavaat, taakkua sermip issussisianik uuttortaasimapput, Nunarsuup nutsuineranik aamma sermip sukkassusianik.

DMI-mit EU'p suliniutaani Ice2Sea ilisimatusartut peqatigalugit suliamik ingerlatsipput.

- Aakkiartornermit ilisimasat nutaat sermip ukiunut tullernut 100-niit 200-nut qanoq issusissaanut kisitsinitsinni ilutsit atukkavut iluaqqutigissavavut, Marianne Sloth Madsen oqarpoq.

DMIp kisitseriaatsimini Kalaallit Nunaata qaavaniittut ingerlarngi kisittarpaat, taanna suut tamat ingerlanginut ilaalluinnarpoq. Ullormut allannguutit uani malinnaaffigisinnaavatit.

Allaaserisaq una DMI isumaqatigalugu suliarineqarpoq. Allaaserisaqdmi.dk-mit tigusaavoq Niels Hansenimit allanneqarluni. dmi.dk-mut decembarip 20-anni ilanngunneqarluni. Sermitsiaq.AG decembarip 21 aamma 22-anni saqqummersinneqarluni.