Taamak akileraartarput
Danmarkimi akileraartartut sapaatip akunnerani uani kikkunnut tamanut saqqummiussuunneqarput - taakkunannga takuneqarsinnaavoq ingerlatsiviit Nunatsinnut attuumassuteqartut Danmarkimi qanoq akileraartarnersut
Sapaatip akunnerani qaangiuttumi Danmarkimi tusagassiivinni ingerlatsiviit assigiinngitsut qanoq akileraartarnerat allaaserisarpaat, ukiumut 2011-mut akileraarutaasimasut tamanut saqqummiunneqarnerisa kingorna.
Allattukkanit takuneqarsinnaavoq ingerlatsiviit arlaatigut nunatsinnut attuumassuteqartut Danmarkimi qanoq akileraartarnersut - ilanngui ilannguppagut:
Ilaatigut takuneqarsinnaavoq Royal Greenland Seafood, Royal Greenlandimit pigineqartoq ukioq 2011 Danmarkimi akileraarutinik akiliinngitsoq, akileraarutitut isertitassat 2,8 millioner koruuninik amigartoorfiummata.
Polar Seafood Denmark 23 millioner koruuningajalluinnarnik akileraartoq, isertitanit akileraarutaasussanit 92 millioner koruuninit.
Royal Arctic Logistics 2011-mi 800.000 koruunit akileraarutigai – akileraarutsisatut isertitanit 3,2 millioner koruuninit.
Grønlands Rejsebureau 2011 Danmarkimi akileraanngilaq akileraarutissatut isertitaat amigartoorfiummat.
Aamma takuneqarsinnaanngilaq MT Højgaard Grønland kiisalu Arssarnerit qanoq akileraartiginersut, ingerlatsiviit MT Højgaardimit pigineqarnerat pissutaalluni. Kisianni ingerlatsivik tunuliaqutarisaat MT Højgaard 600.000 koruuninik akileraarpoq, isertitaminit akileraarutaasussanit 151 millioner koruuniusunut.
Taamatuttaaq E Pihl og Søn Grønland, E Pihl og Søn-imit pigineqartoq, 350.000 koruuningajalluinnarnik akileraarpoq isertitanit akileraarutaasussanit 17 millioner koruuningajalluinnarnit.
Tele Greenland International millionip affaa isertitanit 2 millionit sinnilaarlugit amerlassuseqartunit.
Kalaallit Illuutaat akileraanngilaq ukiumi 2011-mi amigartunik isertitaqarsimaneq aallaavigalugu.
Grønlands Ejendomsselskab ApS Kalaallit Nunaata Illuutileqat Danmarkimi immikkoortortaa aamma qallunaat akileraarutaanik akiliinngilaq taakkua isertitaat amigartoorfiummata aamma.
Malugiuk: Allattukkani takuneqarsinnaanngimmat ingerlatsiviit Kalaallit Nunaannut akileraartarnersut imaluunniit akileraartannginnersut. Assersuutigalugu Greenland Seafoodip piginnittaa Royal Greenland A/S siorna nunatsinnut 16 millioner koruuninik akileraarpoq.
Allattugaq uani takusinnaavat
Illit qanoq isumaqarpit? Kalaallit Nunaanni akileraartartut aamma kikkunnut tamanut saqqummiunneqassappat? Ataani oqallinneq peqataaffigiuk.