Nunat avannarliit inatsit immikkut ittoq mianersoqqussutigaat
Nunat avannarliit eqqaamiorisagut Kalaallit Nunaanni akissaasernerluinissaq ernummatigaat
Suliniutinut angisuunut inatsimmut mianersoqqussutit taamaallaat qallunaat sulinermik inuussutissarsiutillit akornanni saqqumminngillat, akissaaserluinissaq pillugu Politiken tallimanngornermi allappoq.
Nunani avannarlerni nunat eqqaamiorisatta aatsitassarsiorfinnik pilersitsiniarnermi akissaaserluilluni ingerlatsinissap ammaaffigineqarnera ernummatigineqarmat.
Inatsit immikkut ittoq taanna Folketingimut aqqutissiunneqassaaq nunanut allanut politikkimi immikkut inatsisiliornikkut, taanna maanna qallunaat naalakkersuisuinit sanarfineqarpoq.
Nunat avannarliit siunnersuisooqatigiivi suleqatigalugit, tassani qallunaat ilaasortaatitaanit 16-it Folketingimut ilaasortaasut ilanngullugit socialdemokraaterpassuit tassunga akerlioqataapput.
- Nunanit allanit suliartortitat Kalaallit Nunaanniittut assigalugit periarfissaqassapput pisinnaatitaaffeqarlutillu. Taamaattoqanngippat akissaasernerluinermik taaneqassaaq, Anders Karlsson, socialdemokraterne, Riksdagimi Nunant avannarliit siunnersuisooqatigiivinut ilaasortaq Politikenimut oqarpoq.
- Socialdemokraatitut isumaqarpunga qallunaat tungaanit inatsit immikkut ittoq suliarineqassanngitsoq. Taamaaliorniaraanni ulorianartumiittoqarpoq sumi inissinnissaq nalunarluni, taanna oqarpoq.
Nunat avannarliit siunnersuisooqatigiivini ilaasortaq socialdemokraatiusoq Torfinn Opheim, Politikenimut oqarpoq, kialluunniit socialdemokraatiusup akissaasersuinerlunneq isumaqatiginngilaa, tamanna pinaveersaarniarlugu suut tamaasa sakkugalugit ingerlatsissalluni, tamanna ajuusaarnarpoq.
Suliniutinut angisuunut inatsit Inatsisartuni sap. ak. marluk matuma siorna akuersissutigineqartup qulakkiissavaa aatsitassarsiorsinnaaneq, taassumalli danskit immikkut ilisimasallit naapertorlugit, nunat tamalaat akornanni isumaqatigiissutit naapertunngikkai, pissutigalugu aatsitassarsiortut tusindelikkaat ammaassiffigineqassammata - siullermik kinamut - taakkua nunaminni isumaqatigiissutit kinguaattornersiuteqanngitsut, sulinngiffimmi aningaasartaqanngitsut nalinginnaasunillu aaqqissuussinertaqanngitsut atussavaat.
Tamatuma saniatigut suliffissaqartitsineq pillugu qilersorsimanngitsumik isumaqatigiinniarsinnaaneq atorneqassanngillat.